Barys beıneli bolashaqqa baıandy baǵyt ustaǵan táýelsiz Qazaqstan jańa tarıhynda óziniń áleýmettik-ekonomıkalyq damýynyń jańa sapalyq kezeńine ótti. Onyń shynaıy dáıektemesi Elbasy Nursultan Nazarbaevtyń Qazaqstan halqyna arnaǵan kezekti Joldaýynan naqty kórinis tapty. Qalyptasqan memlekettiń jańasha damýyna bastaǵan «Qazaqstan-2050» Strategııasyn júzege asyrýdyń qazirgi jáne uzaqmerzimdik naqty josparyn aıqyndaǵan bul tarıhı Joldaýdyń basty ıdeıasy – Qazaqstannyń bolashaǵyna degen nyq senim. Elbasynyń osy kezekti Joldaýy jarııalanǵannan keıin alǵashqy áserlerimen bólisý maqsatynda Parlament Senatynyń depýtaty Svetlana Jalmaǵambetovany áńgimege tartqan edik.
Barys beıneli bolashaqqa baıandy baǵyt ustaǵan táýelsiz Qazaqstan jańa tarıhynda óziniń áleýmettik-ekonomıkalyq damýynyń jańa sapalyq kezeńine ótti. Onyń shynaıy dáıektemesi Elbasy Nursultan Nazarbaevtyń Qazaqstan halqyna arnaǵan kezekti Joldaýynan naqty kórinis tapty. Qalyptasqan memlekettiń jańasha damýyna bastaǵan «Qazaqstan-2050» Strategııasyn júzege asyrýdyń qazirgi jáne uzaqmerzimdik naqty josparyn aıqyndaǵan bul tarıhı Joldaýdyń basty ıdeıasy – Qazaqstannyń bolashaǵyna degen nyq senim. Elbasynyń osy kezekti Joldaýy jarııalanǵannan keıin alǵashqy áserlerimen bólisý maqsatynda Parlament Senatynyń depýtaty Svetlana Jalmaǵambetovany áńgimege tartqan edik.
– Svetlana Jaqııaqyzy, qasıetti juma kúni Táýelsizdik saraıynda taǵy bir tarıhı qujat – Elbasynyń Qazaqstan halqyna arnaǵan kezekti Joldaýy jarııa etildi. Osyǵan baılanysty alǵashqy áserlerińizben bólisip, bıylǵy Joldaýdyń negizgi basymdyqtaryn atap ótseńiz.
– Álmısaqtan ámbege aıan aqıqat – el damýynyń basty tuǵyry – ekonomıka. Memleket basshysynyń Qazaqstan halqyna arnaǵan bıylǵy Joldaýy «Qazaqstan-2050» Strategııasyn naqty júzege asyrýdyń barlyq salalardaǵy taıaý merzimdegi jáne uzaqmerzimdik mindetteri men maqsattaryn aıqyndaǵan strategııalyq qujat bolyp tabylady. Elbasy óziniń Joldaýynda «Kúshti, qýatty memleketter ǵana uzaqmerzimdik josparlaýmen, turaqty ekonomıkalyq ósýmen aınalysady. «Qazaqstan-2050» Strategııasy – barlyq salany qamtıtyn jáne úzdiksiz ósýdi qamtamasyz etetin jańǵyrý joly... Strategııany múltiksiz oryndap, emtıhannan múdirmeı ótý – ortaq paryz, abyroıly mindet!» dep atap kórsetti.
Memleket basshysy halyq nazaryna usynǵan osy bir strategııalyq baǵdarlamasynda elimizdiń 2050 jylǵa deıingi ekonomıkalyq-áleýmettik damý kezeńderin jeti besjyldyqqa bólip, kezeń-kezeńmen atqarylatyn keshendi mindetterdi saralady. Bul jeti besjyldyqtyń árqaısysy elimizdiń álemdegi eń damyǵan 30 memleketiniń quramyna kirý jónindegi bıik maqsatqa jetý jolyndaǵy ortaq mindetti oıdaǵydaı is-júzine asyrý belesteri bolmaq. Qazir elimizdi damytýdyń údemeli ındýstrııalyq-ınnovasııalyq baǵdarlamasynyń alǵashqy besjyldyǵynyń qorytyndy jylynda turmyz. Birinshi besjyldyqta atqarylǵan sharalar aýqymy úlken. Memleket basshysy bıylǵy Joldaýynda kelesi – ekinshi jáne odan keıingi besjyldyqtarda atqarylatyn naqty mindetter aýqymyn aıqyndady. Bul besjyldyqtarda mobıldi, mýltımedııalyq, nano jáne ǵaryshtyq tehnologııalar, robotty tehnıka, gendik ınjınerııa salalaryn, bolashaqtyń energııasyn izdeý men ashýdyń negizin salýǵa erekshe mán berilmek.
– Joldaýda qazaqstandyqtardyń turmys jaǵdaıyn jaqsartyp, ómir súrý dárejesin arttyrý máselelerine erekshe mán berildi. Osy oraıdaǵy pikirińiz qandaı?
– Elbasy barlyq joldaýlarynda halyqtyń ómir sapasyn arttyrýdy birinshi kezekke qoıady. Keıbir rette el arasynda osy uzaqmerzimdik baǵdarlamalar qabyldaýdan góri eldiń búgingi turmys jaǵdaıyn jaqsartatyn máselelerdi kún tártibine qoısa durys bolar edi degen pikirler de aıtylyp qalady. Aqıqatyna kelsek, «Qazaqstan-2030», «Qazaqstan-2050» Strategııalyq baǵdarlamalarynyń negizgi maqsaty da halqymyzdyń turmys jaǵdaıyn jaqsartyp, ómir súrý sapasyn arttyrý bolyp tabylady. Ol týraly Joldaýda «Strategııa – kúnnen-kúnge, jyldan-jylǵa elimizdi, qazaqstandyqtardyń ómirin jarqyn ete túsetin naqty praktıkalyq ister baǵdarlamasy» dep atap kórsetilgen. Memleket basshysynyń aldymyzǵa qoıyp otyrǵan elimizdiń álemdegi eń damyǵan 30 eldiń qataryna kirý jónindegi jospary da osy halqymyzdyń ómir sapasyn jaqsartý maqsatyndaǵy kókeıkesti oılardan týǵan. Joldaýda atap kórsetilgenindeı, osy bıik mejege jetý úshin Elbasy el Úkimetiniń aldyna naqty tujyrymdama jobasyn jasaý jóninde mindet qoıdy.
– Joldaýda azamattyq qyzmetshilerdiń eńbekaqysyn taǵaıyndaýdyń jańa úlgisin ázirleý máselesi kún tártibine qoıyldy. Bul shyn máninde áleýmettik sala qyzmetkerleriniń jalaqysyn eleýli túrde kóterýge jol ashady emes pe?
– Osy ýaqytqa deıin muǵalimderdiń, dárigerlerdiń jáne áleýmettik sala qyzmetkerleriniń jalaqysyn belgileý máselesinde túsiniksiz jaǵdaılardyń oryn alyp kelgendigi jasyryn emes. Bıylǵy Joldaý boıynsha 2015 jylǵy 1 shildeden bastap, elimizde azamattyq qyzmetshilerdiń eńbekaqysyn belgileýdiń jańa úlgisi engiziletin boldy. Iаǵnı, 2015 jyldyń 1 shildesinen densaýlyq saqtaý salasy qyzmetkerleriniń eńbekaqysy 28 paıyzǵa deıin, bilim berý salasy qyzmetkerleriniń eńbekaqysy 29 paıyzǵa deıin, Áleýmettik qorǵaý salasy qyzmetkerleriniń jalaqysy 40 paıyzǵa deıin ósiriletin azamattyq qyzmetshiler eńbegine aqy tóleýdiń jańa modeli engiziledi. Bul kópshiliktiń kóńilinen shyǵatyn, kópten kútken ıgi qadam bolmaq.
Sonymen birge, bul Joldaýda múmkindigi shekteýli azamattardyń turmys jaǵdaıyn kóterýge baılanysty keshendi mindetterdi sheshý máselesi kóterildi. Nursultan Nazarbaev Joldaýda «...múmkindigi shekteýli azamattarymyzǵa kóbirek kóńil bólý kerek. Olar úshin Qazaqstan kedergisiz aımaqqa aınalýy tıis», – dep atap kórsetti. Endigi ýaqytta múmkindigi shekteýli adamdarǵa turmystyq qyzmet kórsetý, taǵam ónerkásibi, aýyl sharýashylyǵy kásiporyndarynda jumysqa ornalasý úshin barlyq múmkindikter jasalatyn bolady. Elbasy barlyq kásipkerler men bıznesmenderdi múmkindigi shekteýli azamattarǵa qamqorlyq kórsetýge shaqyrdy.
– Joldaýda elimizdiń ulttyq ıdeıasynyń tuǵyryna aınalatyn «Máńgilik El» Patrıottyq aktisin ázirlep, qabyldaý máselesi atap kórsetildi. «Máńgilik El» ulttyq ıdeıasy tóńiregindegi oıyńyz qandaı?
– Shyndyǵynda da kópshilik arasynda elimizdiń ulttyq ıdeıasy týraly ártúrli pikirler únemi aıtylyp keledi. Tuńǵysh Prezıdentimiz óziniń parasattylyǵy men danalyǵyn osy joly taǵy bir aıqyn pash etti. Ol keıbireýler ár saqqa júgirtip, áńgime týyndatyp júrgen ulttyq ıdeıamyzdyń tuǵyryn buljytpaı aıqyndap berdi. Ata-babamyz armandaǵan Táýelsizdigimizdi baıandy etip, elimizdi órkenıet bıigindegi elderdiń aldyńǵy qatardaǵy shoǵyrynan kóretin bolsaq, ulttyq ıdeıamyzdyń oryndalǵany emes pe. Máńgilik El bolýdan artyq qandaı maqsat, qandaı arman bolýǵa tıis. Memleket basshysy barlyq qazaqstandyqtardy bir maqsatqa jumyldyratyn ulttyq ıdeıanyń jeti tuǵyryn belgilep berdi. Endigi mindet – osy jeti keshendi mindetti is júzine asyrý maqsatynda jumyla eńbek etip, birligimizdi berik, berekemizdi baıandy ete berý barshamyzdyń basty paryzymyz bolmaq.
Áńgimelesken
Jylqybaı JAǴYPARULY,
«Egemen Qazaqstan».