Úndistannyń Qazaqstandaǵy elshisi Shýbdarshını Trıpatı hanym Almatyda elimizdiń jetekshi basylymdarynyń ókilderimen kezdesken kezde eki el arasyndaǵy qarym-qatynas týraly aıtyp berdi.
Osy jyldyń mamyr aıynda ǵana qyzmetine kirisken elshi hanym meıirimdi jáne jomart halqy bar osy ádemi el týraly burynnan estigenin, onyń soltústik pen ońtústik aımaqtaryn aralap úlgergenin, osy merzim aralyǵynda Qazaqstandy jańa qyrynan tanyǵanyn aıtty.
«Bizdiń elderimizdiń arasyndaǵy ejelgi jáne tarıhı qatynastar 2000 jyldan astam ýaqyt buryn paıda bolǵan. Elder arasynda taýarlarmen únemi jáne turaqty almasý boldy. Eń bastysy, ıdeıalar jáne mádenı yqpal almasý da baıqaldy. Men, ekijaqty qatynastar turǵysynan, strategııalyq áriptesterdiń ekeýi de – Úndistan da, Qazaqstan da ózderiniń tıisti qasıetterin tolyqqandy kórsetkenin qýana málimdeımin. 2019 jylǵy maýsymda Arys qalasyndaǵy oq-dáriler qoımasyndaǵy jarylystan keıin Úndistan Qazaqstanǵa qalpyna keltirý operasııalaryna kómektesý jáne qurbandar sanyn azaıtý úshin bombalardy zalalsyzdandyrý boıynsha kúsheıtilgen kostıýmder berdi. Qazirgi COVID-19 pandemııasynyń órshýi kezinde Úndistan úkimeti gıdroksıhlorohın dári-dármegin Qazaqstanǵa COVID-19-ben kúreste gýmanıtarlyq kómek retinde jiberdi. Sol sııaqty bıyl biz tap bolǵan daǵdarys kezinde Qazaqstan Úndistandaǵy pandemııamen kúresý úshin arnaıy reıspen medısınalyq jabdyqtar jetkizdi, sol úshin biz Qazaqstan halqyna rızashylyǵymyzdy bildiremiz. Osyndaı tereń túsinistikpen jáne bir-birimizge degen ózara syılastyqpen bizdiń ekijaqty qatynastarymyz úshin zor áleýet bar ekenin kórip otyrmyn», dedi Shýbdarshını Trıpatı.
Búgingi tańda Úndistan – kóptegen azyq-túlik jáne aýyl sharýashylyǵy taýarlarynyń, onyń ishinde sút jáne jemis-jıdekterdiń iri óndirýshisi, sondaı-aq bıdaı, kúrish, shaı jáne maqtanyń ekinshi iri óndirýshisi.
Elshi hanym naqtylap ótkendeı, Úndistan – IT qyzmetteriniń eń iri ortalyqtarynyń biri. Álemdegi 20 úzdik IT kompanııalardyń beseýi – úndi kompanııalary. Úndistannyń tehnologııalyq kompanııalary ósýdi qamtamasyz etedi, qorlarǵa, densaýlyq saqtaýǵa, bilim alýǵa qol jetimdilikti arttyrdy, jumys oryndaryn qurdy jáne kedeıshilik deńgeıin azaıtty.
Úndistannyń ǵarysh salasyndaǵy jetistikteri búkil álemge áıgili. Sońǵy 75 jyl ishinde Úndistan ártúrli áleýmettik-ekonomıkalyq salalarda óte tez damydy, aldaǵy 10-15 jylda álemdegi eń iri ekonomıkalyq memleketter úshtigine kiredi degen úmit bar.
Úndistan óziniń startaptarǵa negizdelgen ekojúıesimen tanymal. Sarapshylar bul el álemdegi eń jas kásipkerlerdiń otany ekenin aıtady. Bul derekti elshiniń sózimen naqtylasaq, Úndistandaǵy kásipkerlerdiń ortasha jasy 27-ge teń.
Úndistan elshisi dıplomatııalyq eńbek jolyn 1991 jyly bastasa, Qazaqstan – elshi retinde kelip otyrǵan ekinshi eli.