Sýdyń tilsiz jaý ekenine jazdyń kúni jıi kóz jetkizemiz. Shomylý maýsymy bastala sala Tótenshe jaǵdaı departamentiniń qyzmetkerleri shyr-pyr bolyp, qaýipsizdik sharalaryn túsindirýmen júredi. Ony túsinip, túısinetinder bar da, aıtqan eskertýlerge qulaq aspaıtyndar bar. Jaz bastalǵaly Shyǵys Qazaqstanda 34 adam sýǵa ketip, jazym bolǵan eken.
Mundaıda qazaq «jazmyshtan ozmysh joq» dep jubatysady. Biraq saqtanǵandy saqtaıdy emes pe Qudaı?! Qalaı bolǵanda da, ruqsat berilgen aýmaqtarǵa ǵana shomylý kerek. Mamandardyń túsindirip júrgen erejeleri qarapaıym. Keıde sony eskermeı jatady el.
TJD mamandarynyń málimetinshe, shomylý maýsymynda qutqarýshylar 22 adamnyń ómirine arasha túsken. Olardyń altaýy balalar. Qutqarýshylar saqadaı saı daıyn júrgenimen, sý aıdyndaryn túgeldeı qadaǵalaý múmkin emes. Qaıǵyly jaǵdaı oryn almaýy úshin jaýapkershilikti ár adam ózi sezinýi kerek. 2020 jyly 33 adam (9 bala) sýǵa batyp, kóz jumsa, bıyl 34 adam sýǵa ketken.
– 13 oqıǵa balalar qaraýsyz qalǵan kezde oryn alǵan. Bes adam mas kúıinde shomylyp, qaza tapty. Qaıǵyly jaǵdaılardyń kóbi arnaıy jabdyqtalmaǵan jaǵajaılarda oryn aldy. Demalys bazasynyń janynda balyq aýlap otyrǵan azamat ta sýǵa batyp ketti, – dedi TJD baspasóz hatshysy Marına Lıskova.
Jazdyń alǵashqy kúnderinen bastap qutqarýshylar profılak- tıkalyq jumystar júrgizip, túsindirý aksııalaryn ótkizip keledi. Esep-qısapqa súıensek, 5 myńnan astam profılaktıkalyq reıd uıymdastyrylyp, demalýshylarǵa 86 myń jadynama taratylǵan eken. Bazalardyń ıelerimen jáne jergilikti atqarýshy organdarmen birlesip, azamattardyń qaýipsiz demalysyn qamtamasyz etý maqsatynda 33 memorandým jasalǵan.
– Aımaqtaǵy barlyǵy ózen-kólderdiń jaǵalaýynda demalys jáne sport úshin 16 oryn bekitilgen. Al shomylýǵa tyıym salynǵan 64 ýchaske belgilendi. Jergilikti atqarýshy organdarmen birlesip, shomylýǵa qaýipti oryndarǵa 384 tyıym salý jáne eskertý belgilerin ornattyq. Sebebi bul ýchaskelerdegi sýdyń túbi tekserilmegen, qaýipti aǵyn men ıirimder baıqaldy. Jaqyn jerde qutqarýshylar men dárigerlerdiń beketteri de joq, – dep túsindirdi TJD baspasóz hatshysy.
Bazalardyń ıelerine kómektesý úshin TJ departamentinde qoǵamdyq qutqarýshylardy daıarlaý kýrstary da uıymdastyryldy. Qazirdiń ózinde 110-nan astam azamat bilim alyp úlgergen. Shomylý maýsymy kezeńinde Alakólde jáne Kókpekti aýdanynda demalýshylardyń qaýipsizdigin qamtamasyz etý úshin órtten qutqarý beketteri quryldy.
Aıtqandaı, sýǵa túsý kezinde tártip pen ereje buzǵan demalýshylar jaýapqa tartylǵan.
– Jalpy jaǵalaýda demalý tártibin 155 adam buzsa, 476 adam mas kúıde ereje buzǵany anyqtaldy, – dep atap ótti Shyǵys Qazaqstan oblystyq polısııa departamentiniń jergilikti polısııa qyzmeti bastyǵynyń orynbasary Andreı Larıonov.
Osy tusta aıta keterligi, sýǵa mas kúıde shomylýǵa, qaıyqtardan, katerlerden, aılaqtardan, sondaı-aq qurylystardan sýǵa sekirýge qatań tyıym salynady. Tekserilmegen jáne jabdyqtalmaǵan jerlerde súńgýge de bolmaıdy. Balalardy jaǵalaýda qaraýsyz qaldyrýǵa bolmaıtynyn da esten shyǵarmaý qajet.
Shyǵys Qazaqstan oblysy