Elordadaǵy Ulttyq mýzeıde el Táýelsizdiginiń otyz jyldyǵyna oraı Koreıa Respýblıkasy elshiliginiń Koreı mádenı ortalyǵynyń uıytqy bolýymen Sumukhwa Monologue atty sııamen salynǵan keskindeme kórmesi ashyldy.
Kórmege Koreıanyń Cholla-Namdo provınsııasy men basqa da óńirleriniń talantty qylqalam sheberleriniń týyndylary usynyldy. Onda tabıǵattyń ádemi kórinisteri men álemniń paıda bolý jaratylysyn ózek etken fılosofııalyq taqyryptar qozǵalǵan.
Mádenı is-sharanyń ashylýynda Ulttyq mýzeı dırektorynyń orynbasary Abaı Satýbaldın kórmeniń mańyzyna toqtalyp: «Qazirgi kúni eki el arasyndaǵy baılanys nyǵaıyp, jyl saıyn eki jaqty kóptegen is-sharalar ótedi. Ásirese Ulttyq mýzeı atalǵan eldiń ǵylymı uıymdarymen birlesken jobany qolǵa alyp, arheologııa men mádenı mura salasynda zertteý jumystaryn júzege asyrýda. Búgingi kórmeniń ashylýy da sol mádenı qarym-qatynastyń bir kórinisi», dedi ol.
О́z kezeginde Koreıa respýblıkasynyń Qazaqstandaǵy Tótenshe jáne О́kiletti elshisi Ký Hong-sok kórmeni uıymdastyrýǵa uıytqy bolǵan Ulttyq mýzeı ujymyna alǵysyn aıtyp, halqymyzdy táýelsizdiktiń aıtýly merekesimen quttyqtady.
– El Táýelsizdiginiń 30 jyldyǵy men el Prezıdenti Qasym-Jomart Toqaevtyń Koreıa respýblıkasyna memlekettik sapary qarsańynda, sondaı-aq Koreıany azat etý kúnine oraı ótip otyrǵan kórme sizderge jylylyq syılaıdy dep oılaımyn. Koreıa elshiligi men bizdiń mádenı ortalyq aldaǵy tańda da osyndaı qyzyqty ári tanymdyq is-sharalar ótkizýdi josparlap otyr,– dep kelýshilerge rızashylyǵyn bildirdi.
Jalpy «Sýmýkhva» keskindemesi dep basqa tús qospaǵan qara sııamen boıalǵan týyndylardy aıtady. Ol qaǵaz betindegi syzyqtar men bos keńistikterge nazar aýdartyp, jaryq reńkteri men qara sııa gradasııasy arqyly ishki rýhanı álemdi kórkem kesteleıdi. Aıta keteıik, kórme 17 qazanǵa deıin jalǵasady.