Abaı aýdanynyń Topar kentindegi Sherýbaı batyrǵa qoıylǵan eskertkish belgi kóp jyldar boıy kútim kórmeı, toza bastaǵan-tuǵyn. Taıaýda jergilikti «Jastar Alıansy» qoǵamdyq birlestiginiń eriktileri men Abaı atyndaǵy orta mekteptiń pedagogteri bul kemshilikti joıý boıynsha aksııa uıymdastyrdy.
Sherýbaı Bıboldyuly – qalmaqqa qarsy soǵystarda erligimen kózge túsken batyr. Onyń týyp-ósken mekeni osy Topar kentiniń mańy. Qaraǵandy oblysyndaǵy Shet jáne Buqar jyraý aýdandarynyń aýmaǵymen aǵyp ótetin Sherýbaı-Nura ózeni batyrdyń atymen atalady. Budan bólek osy ózenniń jaǵasynda batyr esimimen atalatyn Sherýbaı-Nura stansasy bar. Igi istiń bastamashysy, «Jastar Alıansy» QB basshysy Temirlan Kákenov eskertkish belgini qalpyna keltirý jumysyna 15 adamnyń qatysqanyn aıtady.
– Uzaq jyldar kútim bolmaǵannan keıin, eskertkish belgi óte nashar kúıge túsken eken. Arqanyń qytymyr klımaty da onyń buzyla bastaýyna zııanyn tıgizse kerek. Osy aksııa aıasynda biz óte taǵylymdy sharýa bitirdik dep maqtanyshpen aıta alamyz, – deıdi ol.
Eriktiler men pedagogter eskertkish belginiń shynjyr qorshaýyn, qalqan men naızany syrlap, onyń tuǵyryn da nyǵaıtty. Sonymen qatar mańaıyn kúl-qoqystan tazartty.
Qaraǵandy oblysy,
Abaı aýdany