Aýǵandaǵy aǵaıyn nazardan tys qalmaıdy

Vedomstvonyń málimetinshe, elimizge 42 jolaýshy kelgen, onyń ishinde 15 eresek adam jáne 10 bala, sondaı-aq Qazaqstan elshi­liginiń qyzmetkerleri bar. Odan basqa, osy bortpen Qyrǵyz­stannyń ótinishi boıynsha Qyr­ǵyz Respýblıkasynyń 14 aza­maty evakýasııalandy. Gýma­nı­tar­lyq operasııa retinde osy ushaq­pen Qazaqstan elshiligine kómek surap júgingen 1 Reseı azama­ty men 1 Lıtva azamaty Aýǵanstan Islam Res­pýb­lıkasy­nan shyǵaryldy. «Qazaq­stan Res­pýb­lıkasy árdaıym sheteldegi óz aza­mattarynyń múd­deleri men qu­qyq­taryn qor­ǵaıdy», delingen habarlamada.

Sondaı-aq Qazaqstan Pre­zı­denti Syrtqy ister mınıstrligine Aýǵanstandaǵy qazaqtardyń qa­ýip­sizdigin qamtamasyz etýdi jáne qajet bolǵan jaǵdaıda tarıhı Otanyna qaıtarý máselesi bo­ıynsha barynsha kómek kórsetýdi tapsyrdy. Bul týraly Syrtqy ister mınıstrliginiń resmı ókili Aıbek Smadııarov málimdedi.

«Aýǵanstandaǵy etnostyq qazaqtardyń ótinishine baılanysty Memleket basshysy Qasym-Jomart Toqaev Syrtqy ister mınıstrligine olardyń qaýipsizdigin qamtamasyz etýdi jáne qajet bolǵan jaǵdaıda tarıhı Otanyna qaıtarý máselesi bo­ıynsha barynsha kómek kórsetýdi tapsyrdy», dedi A.Smadııarov arnaıy brıfıngte.

Qazirgi kezde Aýǵanstandaǵy elshilikke tıisti tapsyrma beril­di. Osy oraıda Syrtqy ister mı­nıstrliginiń resmı ókili aýǵan jerinde myńdaǵan qazaq bar degen aqparatty joqqa shyǵardy.

«Bizde bar málimetterge sáı­kes, Aýǵanstan aýmaǵynda 15-ke jýyq etnostyq qazaq otbasy tu­ra­dy – shamamen 200 adam. Al keı­­bir qazaqstandyq buqaralyq aqpa­rat quraldary aýǵan jerin­de bir­neshe myń qazaqtyń tura­ty­ny tý­raly tekserilmegen aqpa­rat ta­ratty. Bul shyndyqqa sáı­kes kel­meıdi. Osyǵan baıla­nys­ty aq­pa­ratty muqııat tekserip otyrýdy jáne halyqty dúrliktirmeýdi su­raımyz», dedi A.Smadııarov.

Onyń aıtýynsha, sońǵy kezde elshilikke ózderin «qazaqpyz» dep tanystyratyn túrli toptar jıi kele bastaǵan. Biraq is júzinde eshqandaı dáleli joq.

«Olardyń keıbireýi qazaqsha bilmeıdi. Ata-babalarynyń Aýǵan­stan aýma­ǵyna qonys aýdarý tarıhy men rý-taıpalyq baıla­nys­tary týraly da aıta almaı­dy. Biz etnostyq qazaqtardyń tarıhı Otanyna ora­lýyna kómek kór­setý týraly ótinishterge muqııat tek­seris júr­gizemiz», deıdi mınıs­trliktiń resmı ókili.