Indettiń taralýynyń báseńdeıtin túri joq. Álem elderi jaǵdaıǵa qatysty túrli sharalar qoldanyp, qaýipsizdik máselesin qaıta kún tártibine shyǵara bastady.
AQSh indetten bir kúnde myńnan astam adamnyń qaıtys bolǵanyn málimdedi, bul shamamen bir saǵatta 42 adamnyń ómiri úzildi degen sóz. Mamandardyń aıtýynsha, vırýstyń delta shtamy eldiń az vaksınalanǵan aımaqtarynda keńinen taralyp jatyr. Ahýal sońǵy aıda qatty ýshyqqan. Mundaı, bir kúnde myń adam qaıtys bolǵan jaǵdaı sońǵy ret naýryz aıynda tirkelgen.
Bastapqyda úkimetter men bıznes ókilderi vaksına saldyrýdy yntalandyrý úshin aqshalaı syıaqylar men ózge de syılyqtar usynǵanymen, jaǵdaı kúrdelengenin kórgen keıbir kompanııalar men shtattar jumys ornyn saqtap qalǵysy keletin jumysshylarǵa vaksına saldyrýdy mindetteı bastady.
Ádette qatal sharalar engizetin Aýstralııa anyqtalǵan bir naýqas úshin el astanasy men oǵan irgeles aımaqty bir aptaǵa jabatyn boldy. Kásiporyndar men ózge mekemelerdiń jumysy shekteledi, al turǵyndar kúnine bir saǵattan artyq syrtta sportpen shuǵyldana almaıdy. Jumysty múmkindiginshe úıden atqarý mindettelip otyr.
Al Jańa Zelandııa Úkimeti el shekarasy jyl sońyna deıin halyqaralyq saıahatshylar úshin jabylatynyn málimdedi. Premer-mınıstr Djakında Ardern jýrnalısterge eldiń áli tolyq ashyla almaıtynyn jáne vaksınalaý aıaqtalǵanǵa deıin shekara jabyq bolatynyn aıtty. Jańa Zelandııada ekpe alý ózge damyǵan elderge qaraǵanda baıaý júrgen. Turǵyndardyń shamamen 29 paıyzy vaksınanyń bir dozasyn, al 17 paıyzy tolyǵymen alǵan. Pandemııa bastalǵannan beri 4,9 mıllıon halqy bar elde 2557 ınfeksııa juqtyrý jáne 26 ólim tirkelgen.
Jaǵdaıdyń ýshyqqanyn kórshiles Reseı de málimdedi. Elde pandemııa bastalǵaly kúndelikti ólim sanynyń eń joǵary kórsetkishi tirkelgen, ıaǵnı bir kúnde 808 adam qaıtys bolǵan. Johns Hopkins ýnıversıtetiniń málimeti boıynsha, qazirgi ýaqytta Reseıde COVID-19 indetine qatysty ólimniń resmı sany – 168 049 adam. Bul – álemdegi besinshi kórsetkish. 24 maýsymnan bastap elde bir kúnde 20 myńnan astam jańa jaǵdaı tirkelgen.
Al Olımpııa oıyndary aıaqtalǵan Japonııada demalys maýsymy áli bitken joq. Vırýs juqtyrǵandar sany artqanyna qaramastan, halyq úkimettiń saparlarǵa shyqpaı, barlar men meıramhanalarǵa barmaýǵa shaqyrýyn tyńdar emes. Japonııada kúndelikti naýqastar sany bir aptadan astam ýaqyt ishinde 10 myńnan asty, al sońǵy tórt aıda olardyń jalpy sany eki ese artyp, 1 mıllıonnan asqan. Jeksenbide aıaqtalǵan oıyndar kezinde Tokıodaǵy kúndelikti anyqtalǵan naýqastar sany úsh ese ósken. Premer-mınıstr Esıhıde Sýga baıaý bastalǵan, biraq qazir jaqsy júrip jatqan vaksınalaýǵa úmit artyp otyr.
Osylaısha, álemniń túkpir-túkpirindegi memleketter indettiń jańa qaýpimen betpe-bet kelip otyr. Kóp elde vaksınalaý prosesi baıaý júrip, vırýstan qaıtys bolǵandar sany kóbeıip barady.