Memleket basshysy Nursultan Nazarbaev Búkilálemdik thekvondo federasııasynyń prezıdenti Chýngvon Chomen kezdesti, dep habarlady Prezıdenttiń baspasóz qyzmeti.
Memleket basshysy Nursultan Nazarbaev Búkilálemdik thekvondo federasııasynyń prezıdenti Chýngvon Chomen kezdesti, dep habarlady Prezıdenttiń baspasóz qyzmeti.
Qazaqstan Prezıdenti Búkilálemdik thekvondo federasııasy basshysynyń sapary elimizdegi bul sport túriniń damýyna odan ári serpin beretinin aıtyp, rızashylyǵyn bildirdi.
– Qazaqstannyń thekvondo federasııasy Búkilálemdik thekvondo federasııasy quramyna 1993 jyly kirdi. Osy kezden bastap sporttyq jekpe-jektiń osy túri bizdiń elde qarqyndy damı bastady, 11 myń adam belsene aınalysýda, 250-ge jýyq jattyqtyrýshy jumys isteıdi. Qazaqstandyq sportshylar álemdik jarystarda 9 qola medal ıelendi, al azııalyq deńgeıde altyn medal da bar. Bul tamasha sport túri odan ári damı beredi degen úmitimiz zor. Sebebi, ol jastardy tárbıeleýge jáne salamatty ómir saltyn nasıhattaýǵa baǵyttalǵan. Men sizdiń saparyńyz jastardyń nazaryn osy sport túrine odan ári aýdara túsedi dep senemin, – dedi Nursultan Nazarbaev.
Buǵan qosa, Memleket basshysy bizdiń ulttyń jaýyngerlik ónerge beıim ekenin, Qazaqstan jekpe-jektiń ózge túrleri jáne sporttyń kúsh-qýatqa negizdelgen túrleri boıynsha jaqsy kórsetkishterge qol jetkizgenin atap ótti.
Chýngvon Cho qabyldaý úshin alǵysyn aıtyp, Qazaqstanǵa thekvondonyń odan ári tanyla túsýine baǵyttalǵan saparynyń mańyzdy ekenine toqtaldy.
– Men Sizdiń Qazaqstanda jáne ózge de elderde thekvondony damytýdaǵy bilimdiligińizge tánti boldym. Búginde Qazaqstan – thekvondo boıynsha jarystarda Olımpııalyq oıyndardyń turaqty qatysýshysy jáne sizdiń elderińizdiń áleýeti zor. Thekvondo Qazaqstanda jedel damýda, al sportshylaryńyz sporttyń barlyq túri boıynsha zor tabysqa jetýde. Men jýyq arada Memleket basshysynyń qoldaýymen sizderdiń sportshylaryńyz Olımpıadanyń altyn medalin ıelenedi jáne álem birinshilikterinde jeńiske jetedi dep senemin. Qazirgi ýaqytta thekvondo sporttyq jekpe-jektiń qarqyndy damyp kele jatqan túri bolyp sanalady. Mysaly, álemde shamamen 80 mln. adam shuǵyldanady, al Búkilálemdik thekvondo federasııasyna 205 el múshelikke ótken, – dedi Chýngvon Cho.
Sonymen qatar, kezdesýde jalpy jáne sporttyq medısına salasyndaǵy Qazaqstan men Koreıa Respýblıkasy arasyndaǵy ózara yqpaldastyq, sondaı-aq, densaýlyq saqtaý salasynyń álemdik standarttaryn engizý jónindegi jobalardy iske asyrý máseleleri qaraldy.
Sońynda Chýngvon Cho Nursultan Nazarbaevqa thekvondo (WTF) boıynsha qurmetti toǵyzynshy dan dárejesi belgisin, sondaı-aq, tıisti belbeý men kımonony tapsyrdy.
Memleket basshysy bul kımono aldaǵy ýaqytta thekvondo boıynsha joǵary dan ıelengen qazaqstandyq sportshyǵa tapsyrylatynyn aıtty.