Ulttyq tennıs ortalyǵynyń korttarynda 19-26 qyrkúıekte Astana Open ATP 250 halyqaralyq týrnıri ótedi, dep habarlaıdy Egemen.kz prosports.kz-ke silteme jasap.
Atalmysh jarys ATP-nyń jańartylǵan resmı kúntizbesine engizilgen. Qazaqstan tennıs federasııasynyń vıse-prezıdenti Iýrıı Polskııdiń aıtýynsha, ATP-nyń dırektorlar keńesi men qatysqan oıynshylar ótken jylǵy osy dodanyń deńgeıin joǵary baǵalaǵan. «Pandemııanyń qaıtadan keń taralýyna baılanysty bıyl kúzde Qytaıda kóptegen jarystar ótpeıtin boldy. Buǵan alańdaǵan ATP basshylyǵy bizdiń bir jarysty ótkizýge kelisim bergenimizge rızashylyq bildirdi. Bul – biz úshin jaqsy múmkindik, mundaı jarystar eń aldymen jastarǵa jol ashady», dedi Iý.Polskıı.
Astana Open jarysynan bir apta buryn Nur-Sultan qalasynda erler men áıelder arasynda Qazaqstan chempıonaty ótedi. Munda jeńimpaz atanǵan oıynshy Astana Open-niń negizgi týrnırine, júldegerler irikteý saıystaryna joldama alady. Astana ashyq birinshiligine Aleksandr Býblık, Mıhaıl Kýkýshkın, Andreı Golýbev pen Aleksandr Nedovesovter qatysady. Al Dmıtrıı Popko, Tımofeı Skatov, Denıs Evseev, Beıbit Jýkaev sekildi jastar el chempıonaty arqyly óz baǵyn synap kóredi.
Jankúıerler úshin bir jańalyq, jarysty uıymdastyrýshylar balalardy shekteýli kólemde kortqa kirgizýdi josparlap otyr. Olar barlyq sanıtarlyq talaptarǵa sáıkes áýeli PTR test tapsyrady. Sóıtip ol balalar súıikti tennısshileriniń oıyndaryn óz kózimen kóre alady. Eresek jankúıerler jiberilmeıdi. Qazaqstan tennıs federasııasy barlyq matchtardy QTF saıty men Qazaqstan telearnalarynda kórsetýdi uıymdastyrady