Sanıtarlyq-epıdemıologııalyq baqylaý departamentiniń basshysy, Almaty qalasynyń bas sanıtar dárigeri Jandarbek Bekshın Almatydaǵy oqýshylar ata-analarynyń ótinishi boıynsha onlaın oqı alady dedi, dep jazady Egemen.kz.
Jandarbek Bekshın óziniń Instagram-paraqshasyndaǵy tikeleı efır barysynda sońǵy qaýlysyndaǵy oqýshylardy oqytýǵa qatysty tarmaqty túsindirdi.
Onyń aıtýynsha, oqýshylardyń negizgi bóligi sanıtarlyq sharalardy saqtaı otyryp, dástúrli formatta – mektepke baryp oqıtyn bolady. Bul rette ata-analardyń ótinishi boıynsha qashyqtan oqytý týraly tarmaq kózdelgen.
«Tynys alý organdarynda sozylmaly aýrýlary bar balalar bar, olar úshin biz onlaın oqytýdy qarastyrdyq. Sonymen qatar keıbir ata-ana saý balalaryna da onlaın rejıminde oqýǵa múmkindik berýdi suraıdy. Biz odan bas tarta almaımyz jáne sońǵy qaýlyda ata-analardyń ótinishi boıynsha onlaın oqý múmkindigin qarastyrdyq», dedi Jandarbek Bekshın.
Esterińizge sala keteıik, Almatynyń bas sanıtar dárigeriniń sońǵy qaýlysy 16 tamyzda qabyldanǵan bolatyn. Jańa qaýly boıynsha nysandardaǵy karantın men demalys kúnderi jumys isteýge tyıym salý 31 tamyzǵa deıin uzartylǵan.