Álemge tanymal ánshi Dımash Qudaıbergen kórermenge óziniń Stranger («Beıtanys») atty ánin tanystyrdy. 19 tamyzda Sochıdegi Olımpıadalyq parktiń New Wave Hall sahnasynda alǵash ret oryndalǵan án qobyzben súıemeldenip, kópshilikti tańǵaldyrdy. Ejelgi qazaq aspaby Igor Krýtoı men Dımash Qudaıbergenniń jańa ánine aıryqsha reńk bergendeı.
Dástúrli qazaq mýzykasyn dáripteýge árdaıym zor yqylaspen qaraıtyn ánshi bul joly da aǵylshyn tilindegi zamanaýı ándi qobyz únimen úılestirip, jańalyq jasady. Jańa kompozısııanyń mýzykasyn orys kompozıtory Igor Krýtoı jazsa, mátin avtory – amerıkalyq aqyn Sharon Von. Negizgi aranjırovkamen Dımıtrıs Kontopýlos (Grekııa) jáne Erlan Bekchýrın (Qazaqstan) aınalysqan.
Aıta keteıik, jańa ánge qobyz qosý ıdeıasy Dımashqa Stranger áýenin alǵash estigennen keıin kelgen.
«Biz Stranger-de qobyz partııasyn oryndaýǵa talantty dosymyz Oljas Qurmanbekti shaqyrdyq, sebebi ol – kompozısııanyń emosııasy men sıpatyn tolyq jetkize alatyn úzdik qobyzshy. Onyń arqasynda án erekshe jáne ózgeshe dybysqa ıe boldy. Men qandaı da bir sheteldik kollaborasııada qobyzdyń dybystalýyn árdaıym armandaıtynmyn», deıdi Dımash.
Jańa kompozısııaǵa halyqtyq aspapty qosý týraly sheshim Igor Krýtoıǵa birden unaǵan. Maestro Stranger jańa tústerge ıe bolyp, odan da qyzyqty bolatynyna senipti.
«Dımashtyń talanty, orasan zor vokaldyq múmkindikteri men kóptegen halyqaralyq aýdıtorııaǵa jumys isteýge degen yntasy meni jańa án jazýǵa shabyttandyrdy. Shynymdy aıtsam, men bul kompozısııany taǵy kim oryndaı alatynyn elestete almaımyn», dedi Igor Iаkovlevıch.
Al qobyz partııasyn oryndaýshy Oljas Qurmanbek Stranger áni erekshe ádemi, ózindik shyǵystyq sıpatqa ıe bolǵanyn atap ótti. «Osyndaı úlken sahnada jáne mynadaı joǵary deńgeıdegi is-sharada qobyzdy kórsetý mártebesine ıe bolǵanyma óte qýanyshtymyn. Jaqynda bul óte ádemi qural búkil álemge tanymal bolady dep úmittenemin jáne biz ony ǵalamsharymyzdyń barlyq buryshynan estıtin bolamyz», dedi qobyzshy.