Báıdibek aýdandyq polısııa bólimine jergilikti turǵyndardyń birinen Báıdibek aýdanynyń turǵyny esirtkiniń iri kólemin zańsyz saqtap, ótkizýmen aınalysatyny týraly habarlama túsken, dep jazady Egemen.kz Báıdibek aýdandyq polısııa bóliminiń resmı saıtyna silteme jasap.
Aqparat alysymen kórsetilgen mekenjaıǵa TO PD Esirtki qylmysyna qarsy is-qımyl basqarmasy men Báıdibek APB-nan tájirıbeli tártip saqshylary jetken.
Polıseıler birden jedel-izdestirý is-sharalaryn júrgizip, nátıjesinde esirtki satý qylmysyna qatysty kúdiktini qolǵa túsirdi. Ol aýdan mektepteriniń birinde qazaq tili páninen sabaq beretin muǵalim bolyp shyqty. Jedel ýákilder ustalǵan adamnyń turǵylyqty mekenjaıyn tintý kezinde onyń ashanasyndaǵy shkaftyń ústinen 10 dana bólek paketterge salynǵan hosh ıisti, jasyl tústi, esirtkige uqsas zatty taýyp, tárkilep aldy. Sonymen qatar atalmysh ashananyń shatyrynyń ústinen, aq tústi qapqa salynǵan esirtki zatyna uqsas jasyl tústi zat tapqan. Tabylǵan zattarǵa saraptama taǵaıyndaldy. Saraptama qorytyndysymen kúdiktiden alynǵan zattardyń jalpy salmaǵy 3 keliden astam “keptirilgen marıhýana” bolyp shyqty. Tergeý barysynda kúdikti esirtki zattaryn satý úshin bólip, paketterge salǵanyn moıyndady.
Atalǵan jaıtty polısııa qyzmetkerleri SDTBT-ǵa QR QK-niń 297-baby (Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý) boıynsha tirkedi. Kúdikti qamaýǵa alyndy.
«Sotqa deıingi tergeý amaldaryn jan-jaqty júrgizdik. Kúdiktiden barlyq aıǵaqty zattar tárkilendi. Satýǵa, saqtaýǵa, ótkizýge, qoldanýǵa zańmen tyıym salynǵan zatty satý qylmysyn sońyna jetkizý baǵytynda qarqyndy qyzmet atqardyq. Jınaqtalǵan is-qujattaryn aıyptaý aktisimen aýdandyq sotqa joldadyq. Sottyń úkimimen 47 jastaǵy kúdikti QR QK-niń 297-babymen kináli dep tanylyp, oǵan 10 jyl merzimge bas bostandyǵynan aıyrý jazasy taǵaıyndaldy», dedi tergeýshi Asqar Shýbaı.