Bul týraly Adam quqyqtary jónindegi ýákil Elvıra Ázimova Ishki ister mınıstrliginiń jáne oblystardyń polısııa departamentteriniń ókilderimen birlesip ótkizgen baspasóz konferensııasynda belgili boldy, dep habarlaıdy Egemen.kz QR Adam quqyqtary jónindegi ýákildiń baspasóz qyzmetine silteme jasap.
Jyl saıyn 23 tamyzda búkil álemde qul saýdasynyń qurbandaryn eske alý jáne ony joıý Halyqaralyq kúni atap ótiledi. Bul jobany iske asyrýdy AQSh-tyń Qazaqstan Respýblıkasyndaǵy Elshiligi de qoldaıdy.
«Adam saýdasynyń faktilerine qarsy tabysty is-qımyl jasaý úshin qazirgi problemalardy sheshý tásilderin sapaly ózgertý, ýákiletti organdardyń tyǵyz ózara is-qımyly men júıeli jumysy, memleket pen azamattyq qoǵamnyń kúsh-jigerin shoǵyrlandyrý qajet. Qazirgi daǵdarys barlyq elder men qoǵamǵa áser etti. Jańa jaǵdaı halyqtyń osal toptaryna, onyń ishinde myńdaǵan mıgranttarǵa da teris yqpal etedi. Buǵan tek olardy jumysqa májbúrleý ǵana emes, oryndalǵan jumys úshin aqy tólenbeýi de jatqyzylady. Osyǵan uqsas qylmystardan zardap shekkender memleket kepildik bergen bostandyqtar men adam quqyqtaryn talap etý múmkindiginen aıyrylady. Sondyqtan adam saýdasyna baılanysty qylmystardy anyqtaýǵa jáne tergeýge muqııat nazar aýdarý kerek», dedi baspasóz máslıhatynda Elmıra Ázimova.
Adam quqyqtary jónindegi ýákildiń habarlaýynsha, jyl basynan beri ishki ister organdary adam saýdasyna baılanysty 87 qylmystyq is qozǵady.
Qazaqstan Respýblıkasynyń Prezıdenti Qasym-Jomart Toqaev 2021 jylǵy maýsymnyń basynda adam quqyqtaryn kepildi qorǵaýdy qamtamasyz etý maqsatynda qabyldanýy qajet birinshi kezektegi sharalar týraly Jarlyq qabyldady. QR Úkimeti birinshi kezektegi 26 shara josparyn iske asyrýǵa kiristi, onyń ishinde 16 shara adam saýdasynyń aldyn alý tetigin zańnamalyq kúsheıtý jáne zardap shekkenderge kómek kórsetý jónindegi sharalardy qosa alǵanda, 2021 jyldyń sońyna deıin aıaqtaýdy josparlap otyr.