Nur-Sultan qalasynda 115 kóshe salynyp, jóndeledi. Bul týraly elorda ákimi Altaı Kólginov óziniń Instagram paraqshasynda habarlady, dep jazady Egemen.kz.
«Qurylys maýsymy bastalysymen qalada joldardy jóndeý boıynsha aýqymdy jumystar júrgizilýde. Bıyl 115 kóshe salynyp, jóndeýden ótkiziledi. Onyń 60-y turǵyn úı alaptarynda. Mysaly, Kóktal-1-de 17 kóshe, О́ndiris shaǵyn aýdanynda - 9 kóshe, sondaı-aq, Kirpishti, Jeleznodorojnyı, Ońtústik – Shyǵys, Shubar jáne t.b. kósheler jol jumystarymen qamtyldy, ótken jyldaǵydaı qalanyń eski bóligine, turǵyn úı massıvterine jáne qurylystyń jańa aýdandaryna basa nazar aýdarylady», delingen habarlamada.
Búgin qala ákimi birqatar kóshelerdiń, sonyń ishinde №27 kósheniń (Sh.Beısekova kóshesinen Turan dańǵylyna deıingi ýchaskede) salyný barysymen tanysqanyn atap ótti.
Onyń aıtýynsha, atalǵan ýchaskede aǵymdaǵy jyly 8 jolaqty magıstraldy kósheniń qurylysy aıaqtalady. Uzyndyǵy 3 km bolatyn bul kóshe de aýdandy ınjenerlik jelilermen jáne kirme joldarmen qamtamasyz etýge múmkindik beredi. Bolashaqta Aıtmatov kóshesiniń qurylysy aıaqtalǵannan keıin (E10 kóshesinen Uly dala dańǵylyna deıingi ýchaskede) Turan dańǵyly (Saraıshyq kóshesinen Uly dala dańǵylyna deıin), Muhamedhanov kóshesi (Turan dańǵylynan Aıtmatov kóshesine deıin), E10 kóshesi (Aıtmatov kóshesinen Turan dańǵylyna deıin) jeńildetiledi.
«Sondaı-aq E52, E41 (Bekturov jáne Tóle bı kósheleriniń aýdandary) kósheleriniń qurylys barysymen tanystym. Bul kóshelerdiń máselesi boıynsha bizge turǵyndar júgindi. Qurylys salynatyn aýdandardaǵy kósheler qurylysy atalǵan aýdandardyń damýyna qosymsha serpin beredi, sondaı-aq qala turǵyndarynyń ómir súrý sapasy artady. Jol jumystary elordanyń barlyq aýdandaryn qamtydy. Eki jyl ishinde jóndelgen kósheler sany 300-ge jýyq bolady, bul qalanyń jol ınfraqurylymyn jaqsartatyny sózsiz. Mysaly, ótken jyly 170-ten astam kóshe, onyń 100-i turǵyn úı alaptarynda jóndeldi», dep tolyqtyrdy Kólginov.
«Jumyspen qamtýdyń jol kartasy» baǵdarlamasy boıynsha jóndeý jumystaryn júrgizý salasynda 4 myńnan astam jumys orny quryldy.