«Azamattarǵa arnalǵan úkimet» memlekettik korporasııasy qyzmetkerleriniń jumys sapasy men tıimdiligin arttyrý jumystaryn jalǵastyrýda. Jumysshylardy yntalandyrý maqsatynda 1 shildeden bastap memlekettik korporasııa 1414 biryńǵaı baılanys ortalyǵy bólimderi operatorlarynyń jalaqysy boıynsha kesimdi-syılyqaqyly tólem júrgizý qanatqaqty jobasyn iske qosty. Oǵan Nur-Sultan qalasy, Aqmola, Qyzylorda, Qostanaı jáne Soltústik Qazaqstan oblystaryndaǵy call-ortalyq bólimderinen 106 operator qatysyp jatyr.
Jańa júıe boıynsha qanatqaqty jobaǵa qatysýshylar óz jumystarynyń sapasyna baılanysty kóbirek tabys tabýǵa múmkindik aldy. Bul rette bir kúndik ortasha kórsetkishti, ıaǵnı 90 qońyraý qabyldaǵany úshin eń tómengi jalaqy mólsheri belgilengen. Ortasha kórsetkishten joǵary kelesi árbir qońyraý úshin tólem qosylyp otyrady.
«Eger buryn baılanys ortalyǵynyń operatorlary 90 myń teńge jalaqy alatyn bolsa, jańa júıe boıynsha olardyń eki ese kóp tabys tabý múmkindigi bar. Jańa júıe boıynsha eń joǵarǵy jalaqy mólsheri salyq shegerimderimen qosa alǵanda 170 myń teńgeni quraıdy. Qanatqaqty jobanyń birinshi aıynyń qorytyndysy boıynsha 106 operatordyń 61-i eń joǵary deńgeıge jetti, al taǵy 25 adam normatıvin oryndap, joǵary jalaqy aldy. Biz jańa júıeniń alǵashqy nátıjelerin kórip otyrmyz – «pılotqa» qatysatyn operatorlardyń ortasha eńbek ónimdiligi 114%-ǵa ósti. Eger buryn bir operator kúnine 62 qońyraý qabyldasa, qazir –133 qońyraý. Qanatqaqty joba áli de jalǵasyp jatyr», dedi memlekettik korporasııanyń basqarma tóraǵasy Ádil Qojyqov.
2021 jylǵy 1 sáýirden bastap 1414 Biryńǵaı baılanys ortalyǵy «Ulttyq aqparattyq tehnologııalar» AQ-nan «Azamattarǵa arnalǵan úkimet» memlekettik korporasııasynyń qaramaǵyna ótti. Qyzmetkerlerdiń júktemesin azaıtý úshin Petropavl, Kókshetaý, Qyzylorda jáne Qostanaı qalalarynda biryńǵaı baılanys ortalyǵynyń qosymsha keńseleri ashyldy. Operatorlardyń jumys barysyna onlaın-monıtorıng júrgizildi, daýystyq robottyń jumysy jańartyldy, omnıkanaldyq platforma engizildi, operatorlarǵa qosymsha oqytý júrgizildi.
Halyqqa qyzmet kórsetý ortalyqtary jáne eGov.kz elektrondy portaly arqyly memlekettik qyzmetterdi alý máseleleri boıynsha baılanys ortalyǵyna aı saıyn 1,5 mln qońyraý kelip túsedi. 1 shildeden bastap 1414 baılanys ortalyǵy áleýmettik-eńbek salasy boıynsha qońyraýlar qabyldaı bastady. Buryn osy máseleler boıynsha 1411 qysqa nómirine habarlasý qajet bolatyn.
«Egemen-aqparat»