Kúres túrlerinen О́fede ótken 21 jasqa deıingi jastar arasyndaǵy álem birinshiliginde chempıon atanǵan túrkistandyq Nılýfar Raımova jáne qola júldeger Mádına Aman elge oraldy. Erkin kúres boıynsha synǵa túsken kelestik balýan Asyljan Esengeldi de qola júldeni ıelengen bolatyn. Sala mamandary bul Túrkistan oblysy qurylǵaly beri sportshylardyń álem birinshilikterinde tuńǵysh ret qol jetkizgen, al qazaq eli úshin 13 jyldan keıin kelgen jeńis ekenin aıtýda.
Túrkistan halyqaralyq áýejaıynda sportshylardy jerlesteri, aǵaıyn-týystary, zııaly qaýym ókilderi sán-saltanatpen qarsy aldy. Atalǵan sharada sóz alǵan oblys ákiminiń orynbasary Sáken Qalqamanov el mereıin asyrǵan sportshylarǵa jyly lebizin bildirdi. Sonymen qatar álem chempıony Nılýfar Raımovaǵa 1 000 000 teńgelik sertıfıkat, qola júldeni qanjyǵasyna baılaǵan Mádına Amanǵa 500 000 teńgelik sertıfıkatty qala ákimi Nurbol Turashbekovpen birge saltanatty túrde tapsyrdy.
Álem chempıony Nılýfar Raımova – Q.A.Iаsaýı atyndaǵy HQTÝ-diń 3-kýrs stýdenti. Memlekettik jáne jergilikti basqarý mamandyǵy boıynsha bilim alýda. Eki qyz da – Ábdisalan Nurmahanov atyndaǵy olımpıada rezerviniń mamandandyrylǵan balalar men jasóspirimder sport mektebiniń shákirti. Balýandardyń nátıjeli óner kórsetýine eń birinshi kezekte bilikti bapker Nurjigit Erimbetovtiń sińirgen eńbegi eren. Bapker shákirtteriniń júlde alatynyna senimdi bolǵanyn aıtady. «Álem chempıony atanǵan Nılýfar Raımova da, qola júlde alǵan Mádına Aman da – tól shákirtterim. Ekeýi 12-13 jasynan bastap kúrespen aınalysty. Nılýfar el birinshilikterinde 6 ret top jarǵan. Odan bólek «Azııa balalary» oıyndarynyń kúmis júldegeri atanǵany bar. «QR sport sheberi» ataǵyn ıemdengen. Keshegi jeńisinen keıin «QR halyqaralyq dárejedegi sport sheberi» normatıvin oryndady. Mádına Qazaqstan chempıonatynda júldeger atansa, jastar arasyndaǵy el birinshiliginde top jarǵan. Endi, mine, álem birinshiliginde qola júldege ilinip otyr», deıdi Nurjigit Erimbetov. Álem birinshiliginde alǵashqy aınalymda reseılik balýanmen bolǵan kezdesý qıyndaý bolǵanyn aıtqan Nılýfardyń alǵa qoıǵan maqsaty da bıik. «Kúreske alǵash tátem alyp keldi, jattyqtyrýshy zalda baıqady. Shamamen bir aptalyq jattyǵýdan keıin týrnırge qatysyp, jeńiske jettim. Sodan keıin sportpen aınalysyp, kúresti jalǵastyrýǵa qyzyǵýshylyq paıda boldy. Alla qalasa, aldaǵy ýaqytta Olımpıadaǵa qatysý úshin barymdy salamyn, daıyndalamyn», deıdi álem chempıony.
Eske sala keteıik, altynnan alqa taǵynǵan Nılýfar Raımova 57 kg salmaqta óziniń myqty ekenin dáleldedi. Alǵashqy kezdesýinde reseılik Anastasııa Kozlovany 6:5, belorýssııalyq Marııa Hýlıdany 12:0 esebimen jeńdi. Jartylaı fınalda túrkııalyq Elvıra Kamaloglýdan 4:2 esebimen basym tústi. Al fınaldyq kezdesýde ıtalııalyq Avrora Rýssomen kezdesip, 8:6 esebimen jeńiske jetti.
Túrkistan oblysy