Ár óńirde elge eńbegimen, parasatymen tanylǵan, ortaǵa syıly aıtýly azamattar bolady. Mańǵystaýda Saqyp Kerelbaev dese ony bilmeıtin de, qurmettemeıtin de adam joq. Jastaıynan elge qyzmet etip, óńirdiń ǵana emes, eldiń damýyna úlken úlesin qosqan azamat bul qurmetke laıyqty da. 1947 jyly Mańǵystaý aýdanynyń Taýshyq aýylynda týǵan ol – Batys Qazaqstan aýylsharýashylyq ınstıtýtyn, Almaty Joǵary partııa mektebin, Reseıdiń Plehanov atyndaǵy memlekettik akademııasyn bitirgen ekonomıst, saıasattanýshy, menedjer.
Keńes zamanynda Mańǵystaý aýdanyndaǵy keńsharlarda aǵa esepshi, bas ekonomıst, Mańǵystaý oblystyq partııa komıtetinde nusqaýshy, birinshi hatshynyń kómekshisi, aýylsharýashylyq bóliminiń meńgerýshisi, Mańǵystaý aýdandyq partııa komıtetiniń birinshi hatshysy jáne aýdandyq keńes tóraǵasy, oblystyq halyqtyq baqylaý komıtetiniń tóraǵasy, «Mańǵystaý» agrokombınatynyń bas dırektory, oblystyq aýylsharýashylyq basqarmasynyń bastyǵy, oblys ákiminiń birinshi orynbasary, «Adjıp» KKO dırektorynyń keńesshisi, «OKK» JShS dırektorynyń keńesshisi qyzmetterin atqarǵan. «Qurmet» ordeni men 7 medaldiń ıegeri. Qazaq KSR Joǵarǵy Keńesiniń jáne Mańǵystaý oblysynyń «Qurmet gramotalarymen» marapattalǵan. Mańǵystaý aýdanynyń qurmetti azamaty, zapastaǵy polkovnık. QKP XV, XVI, XVII sezderiniń delegaty, Gýrev jáne Mańǵystaý oblystyq keńesteriniń depýtaty bolyp saılanǵan.
Qyzmet satysy osylaı órilgen Saqyp Búrkitbaıuly qarymdy qalamger de edi. Ol «Beket Ata asy shejiresi», «Mańǵystaý», «Surasań rýymdy – Dáýletaly», «Myń boıaýly Mańǵystaý» kitaptary avtorlarynyń biri, «Túbektiń tanymal tulǵalary» atty kitaby jaryq kórgen. S.Kerelbaev týraly óńir ensıklopedııasynda, ózge de kitaptarda keńinen jazylǵan.
Mańǵystaýda ómirden ótkenine onshaqty kún bolǵan S.Kerelbaevty eske alý is-sharasy ótti. Oǵan Kerelbaevtar áýleti men marqumnyń otbasy qatysty.
Saltanatty is-sharany ashyp bergen oblys basshysy S.Trumov ómiri ónegeli iske, sózi ǵıbratqa toly tulǵa týraly tyń estelikter aıtyp, abzal aǵanyń esimi eshqashan umytylmaıtynyn jetkizdi.
– Saqyp Búrkitbaıuly Mańǵystaý topyraǵynda dúnıege kelip, ómiriniń sońyna deıin kindik qany tamǵan jeriniń damýyna qomaqty úles qosqan arda azamat edi. Táýelsiz Qazaqstannyń qalyptasýy men damýy jolynda aıanbaı ter tókti. Eldiń tizginin ustap, qoǵamǵa abyroıly qyzmet qyldy. О́ziniń 45 jyl qyzmetbaıanynda ıgi isterge muryndyq boldy. Ol keshken ǵumyr, ol ótken eńbek joly – ólke tarıhynyń jarty ǵasyrlyq jylnamasyndaı. Artyna óshpes iz ben ólmes sóz qaldyrǵan Saqyp Búrkitbaıulynyń esimi umytylmaq emes. Onyń jarqyn beınesi máńgi jadymyzda qalady, – dedi ol.
Atalǵan sharada Saqyp Búrkitbaıulynyń dúnıeden qaıtýyna baılanysty Qazaqstan Respýblıkasynyń Memlekettik hatshy Qyrymbek Kósherbaevtan kelip túsken kóńil aıtý haty oqyldy. Sondaı-aq memleket jáne qoǵam qaıratkeri Lázzat Qıynovtyń, Qazaqstannyń eńbek sińirgen qaıratkeri Ǵanı Karınniń, ǵalym, memleket jáne qoǵam qaıratkeri О́mirzaq Ozǵanbaevtyń, Parlament Májilisiniń burynǵy depýtaty Gúlnár Seıtmaǵanbetovanyń arnaıy joldaǵan kóńil aıtý beınejazbalary kórsetildi.
Er esimi el esinde máńgi saqtalatyny anyq.
Mańǵystaý oblysy