Jambyl oblysyndaǵy áskerı bólimdegi jarylystan 88 adam zardap shekken. Bul týraly Jambyl oblysynyń ákimi Berdibek Saparbaev málim etti, dep habarlaıdy Egemen.kz.
«Aýrýhanalarǵa 88 adam júgindi. Olarǵa qalalyq aýrýhanada, Baızaq aýdanynyń ortalyq aýrýhanasynda tıisti medısınalyq kómek kórsetildi. Medısınalyq kómek kórsetýdiń arqasynda jeńil jaraqat alǵan 60-qa jýyq adam úıine qaıtaryldy», dedi oblys basshysy Jambyl óńirlik kómmýnıkasııalar qyzmetindegi baspasóz máslıhaty barysynda.
Onyń dereginshe, qazirgi tańda Taraz qalalyq ortalyq aýrýhanasynda 28 adam jatyr.
«Onyń altaýynyń jaǵdaıy ortasha aýyr. Biraq, ómirlerine eshqandaı qaýip joq. Tańerteń naýqastarmen kezdestik, jaǵdaılaryn suradyq. Dárigerlerden olarǵa qandaı kómek kórsetetindigin bildik. Dári-dármekke qatysty esh másele joq. Qazir olardyń jaǵdaıy turaqty», dedi Berdibek Saparbaev.
Aıta keteıik, keshe saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, jarylys boldy. Apatta, órt sóndirý barysynda 4 áskerı qyzmetshi qaza tapty.