«Qazaqstan temir joly» AQ baspasóz qyzmeti Jambyl bólimshesi Úshbulaq-Aqsholaq aralyǵyndaǵy TJ boıynsha 2021 jylǵy 27 tamyz saǵat 12:00-degi jaǵdaı boıynsha aqparatty taratty, dep habarlaıdy Egemen.kz.
2021 jylǵy 26 tamyzda Taraz - Shý ýchaskesi Úshbulaq-Aqsholaq aralyǵynyń eki joly da barlyq poıyzdyń qozǵalysy úshin saǵat 20:10-da jabyldy.
– Búgin saǵat 08-00-den 09-00-ge deıingi kezeńde NOD, NJS basshylary ınfraqurylymǵa komıssııalyq tekserý júrgizdi, onyń barysynda joldyń, baılanys jelisiniń búlingeni anyqtaldy. Aqaý 11.00-de joıyldy. Qazir ınfraqurylym poıyzdardyń qozǵalysyna tolyqtaı daıyn, – delingen habarlamada.
«Qazaqstan temir joly» AQ-da basqarma tóraǵasy Nurlan Saýranbaevtyń basshylyǵymen shtab uıymdastyryldy. TJ ornynda NOD (temir jol bólimshesiniń bastyǵy) jáne «Jolaýshylar tasymaly» AQ bas dırektorynyń orynbasary I.Besverdiń qatysýymen jedel shtabtar quryldy.
– 9956 jolaýshysy bar 19 jolaýshylar poıyzy kidirip turǵan bolatyn. Onyń ishindegi 2198 jolaýshy Taraz-Aqsholaq stansııalary aralyǵyna avtobýstarmen jóneltildi. 531 adam ózderi erikti túrde ketti. Avtobýspen júrgende Taraz-Aqsholaq stansııalarynyń arasy 41 shaqyrym, jolǵa shamamen 40 mınýt ýaqyt ketedi, – delingen habarlamada.
Kompanııanyń habarlaýynsha, vokzaldar men poıyzdarda túsindirý jumystary júrgizilip jatyr.
– Jol júrý qujattaryn qaıtarý jáne poıyzdardyń keshigýi úshin ótemaqy belgilengen tártippen júrgiziledi. Qazirgi ýaqytta 2,5 mln teńge somasyna 1048 jol júrý qujattaryn qaıtarý rásimdeldi. Kútpegen jaǵdaılar týyndaǵan jaǵdaıda jedel áreket etý úshin ınfraqurylym qyzmetkerleriniń mobıldi brıgadalary, sonymen qatar eki órt sóndirý poıyzy daıyn tur (birinshisi oqıǵa ornynan 15 shaqyrym jerde, ekinshisi Túrksib (Lýgovaıa) stansııasynda), – delingen taratylǵan aqparatta.