Almatyda ótken bilim forýmy barysynda jańa oqý jyly men Táýelsizdiktiń 30 jyldyǵyna oraı qala ákimi Baqytjan Saǵyntaev úzdik pedagogter men bilim berý uıymdaryn marapattady.
Olımpıadada segiz ret ozat atandy
Shahar basshysy almatylyq oqýshylar pandemııa kezindegi qıyndyqtarǵa qaramastan, úzdik nátıjeler kórsetkendigin erekshe atap ótti. Oqýshylardyń bilim saıystarynda kórsetken úzdik nátıjelerin qýanyshpen atap ótken qala basshysynyń aıtýynsha, ótken oqý jylynda respýblıkalyq olımpıadalarda qala oqýshylary 60 medal enshilese, 33 oqýshy Halyqaralyq baıqaýlardyń jeńimpazy atanǵan. Al Prezıdent olımpıadasynda almatylyq oqýshylar 8-shi ret ozat atanyp otyr.
Megapolıs basshysy osy oraıda qalanyń bilim salasyna qosqan eren eńbegi úshin «Elimizdiń bilim berýdegi qurmetti qyzmetkeri», «Ybyraı Altynsarın» tósbelgisi jáne qala ákiminiń «Eńbegi úshin» medalin ustazdarǵa tabys etti. Úlgili mektepterden oza shaýyp, qala ákiminiń grantyn jeńip alǵan M.Maqataev atyndaǵy №140 mektep-gımnazııasy ustazdarynyń eńbegi joǵary baǵalandy. Osy oraıda atalǵan ujym «Eń úzdik orta bilim berý mekemesi» dep tanylyp, 34 mln teńge kólemindegi ákim grantyna ıe boldy.
«Ustaz eńbeginiń óz dárejesinde baǵasyn alýy, qadirlenýi olardy erekshe shabyttandyryp, tyń ıdeıalardy júzege asyrýyna úlken múmkindik týdyrady. Osy oraıda memleket tarapynan ustazdarǵa barlyq jaǵdaı jasalyp, qoldaý kórsetilip kele jatqany qýantady», dep atap ótti №140 mektep gımnazııasynyń dırektory Sánııa Tileýbaı.
Úmitti aqtaǵan
úlgili mektep
Almaty qalasyndaǵy ónegeli tarıhymen erekshelenetin bilim ordalarynyń biri – M.Maqataev atyndaǵy №140 gımnazııanyń irgetasy 1990 jyly qalanǵan. Qarlyǵash Uzaqova, Marııam Demeýova, Talǵat Baımuhambetov, Ákimjan Saılybaev, Janas Salpynov syndy bilikti basshylar basqarǵan mektepte búginde ıgi bastamalar jalǵasyn tabýda. 2008 jyldyń kúz aıynan bergi aralyqta bilim ordasyna Sánııa Tileýbaı basshylyq etip keledi. 1996 jylǵa deıin matematıka-fızıka, hımııa-bıologııa pánderin tereńdetip oqytyp kelgen gımnazııada 1997 jyldan bastap matematıka, aǵylshyn, fızıka, qazaq tili pánderi tereńdetilip oqytylatyn synyptar ashyldy. «Til óneriniń qudiretin tanyǵan, oıyn óleńmen órip, kúlli jurttyń júregine jol tapqan, aqıyq aqyn M.Maqataev atyndaǵy №140 gımnazııa 30 jyldyq tarıhynda kóptegen shákirtterdi «Altyn belgi», «Úzdik attestat» ıegerlerin, túrli baıqaýdyń jeńimpazdaryn tárbıelep ushyrdy. Shırek ǵasyrdan asqan jyldarda №140 gımnazııa keshendi damý josparyn jasap, talaı ıgi isterge uıytqy bolyp keledi», deıdi Sánııa О́skenbaıqyzy.
Qazirgi tańda bul bilim ordasy Almaty qalasy boıynsha 2015 jyly «Úzdik mektep», 2016 jyly respýblıka boıynsha «Daryndy balalarǵa arnalǵan úzdik bilim berý uıymy», 2017 jyly qalalyq kásipodaq uıymy uıymdastyrǵan «Úzdik ujym» atanǵan, kásibı sheber ustazdar men daryndy shákirtterdiń qutty mekeni. Gımnazııanyń aıtýly jetistikterinde gımnazııa dırektory Sánııa Tileýbaıdyń uıymdastyrý sheberligi, kásibı biliktiligi, isker basshylyǵynyń qoltańbasy jatyr desek artyq aıtpaımyz. Daryndy shákirt tárbıeleýshi talantty ustazdar – qala, respýblıka kóleminde ótken «Jyl muǵalimi», «Jyl synyp jetekshisi», «Úzdik oqyrman», «Úzdik qazaq tili páni muǵalimi», «Sóz mergen», «Altyn kómbe», «Úzdik avtorlyq baǵdarlama», «Bilgirler báıgesi», «Tildaryn», «Úzdik pedagog», «Qala ákimi granty» baıqaýlarynyń júldegerleri qyzmet etedi. Olardyń ishinde «Qurmet» ordeniniń, «Qazaqstan Respýblıkasy Bilim berý isiniń Úzdik qyzmetkeri», «Y.Altynsarın», «Lıder obrazovanııa», «Úzdik pedagog» tósbelgileriniń ıegerleri, UBT jáne oqýlyq sarapshylary men UBT suraqtaryn qurastyrýshylar, bilim sapasyn syrttaı baqylaý, oqýlyqtardy saraptaý men apellıasııalyq komıssııalarynyń, kóptegen ádistemelik quraldardyń, oqýlyqtardyń, kómekshi quraldardyń avtorlary da bar.
Mektep túlekteri otandyq joǵary oqý oryndarymen birge Slovakııadaǵy Alexander Dubcek University in Trencin, AQSh-tyń Oregon shtatyndaǵy Iýdjın qalasyndaǵy Lane Community College, Reseı Federasııasy, Qazan qalasy, Áleýmettik jáne gýmanıtarlyq bilim ınstıtýty, Igor Sıkorskıı atyndaǵy Kıev polıtehnıka ınstıtýty, Ýkraınanyń Ulttyq tehnıkalyq ýnıversıtetiniń stýdentteri atanyp, ustazdarynyń mereıin asyrýda.
Al álemdik pandemııa jaǵdaıynda jańa oqý jylynda bilim sapasyn tómendetip almaýǵa bar kúsh-jigerin jumsap otyrǵan ujymnyń maqsaty – tereń bilimdi, ozyq oıly, el erteńin oılaıtyn urpaq tárbıeleý.
Digital Ustaz Almaty jeńimpazy Eýropaǵa barady
Pandemııa kezinde qashyqtan oqytý tájirıbesi búginde mektepterde zamanaýı tehnologııalardy engizý máselesiniń ózektiligin kórsetip otyr. Jańa tehnologııalar ınnovasııashyl bilim ordalary úshin sapaly bilimge múmkindik beredi.
Jańa oqý jylynda ońtústik astanada muǵalimderdi qoldaý sharalaryn júzege asyrý, birinshi kezekte olardyń kásibı sheberliginiń ósýin yntalandyrý jumystary jalǵasyn tabatyn bolady.
Qala ákimi Baqytjan Saǵyntaev bilim forýmy barysynda dástúrli formattaǵy jumysty jańǵyrtý úshin mańyzdy mindetterdiń júzege asatyndyǵyna toqtalyp, pedagogıka qaýymdastyǵynyń nazaryn aýdardy. «N.Nazarbaevtyń bilim qorymen birge sıfrly tehnologııalardy oqytý men meńgerýdi jáne sıfrly pedagogıkanyń úzdik ádisteri tájirıbesin úıretetin Digital Ustaz Almaty jańa baıqaýynyń bastalǵanyn habarlaımyz. Muǵalimderdi Digital Ustaz Almaty baıqaýyna belsendi qatysýǵa shaqyra otyryp, olardyń biliktilikterin arttyrýmen qatar sıfrly dáýirde jumys isteýdiń jańa tásilderin zertteýge qadam jasaıtyn bolady», dep atap ótti.
Digital Ustaz Almaty baıqaýy 3 kezeńde ótedi. Ár kezeńge bilim berý salasyndaǵy jetekshi halyqaralyq spıkerler vebınarlar men master-klasstardyń kóshbasshylary qatysady. Baıqaý jeńimpazdary úshin baǵaly syılyqtar qarastyrylǵan. Birinshi oryn ıegeri bilim taǵlymdamasynan ótý úshin Londonǵa nemese Helsınkıge barady.
ALMATY