Parlamenttiń II sessııasy ashyldy

Jańa sessııa resmı ashylǵannan keıin elimizdiń Ánurany oryndaldy. Parlamenttik sessııany ashqan Memleket basshysy Qasym-Jomart Toqaev Qazaqstan halqyna  «Halyq birligi jáne júıeli reformalar – el órkendeýiniń berik negizi» atty Joldaýyn jarııalap, Qazaqstannyń aldaǵy damý strategııasyn aıqyndap berdi.

Qasym-Jomart Toqaev pandemııadan keıingi kezeńdegi eldi odan ári damytýǵa, densaýlyq saq­taý júıesiniń tıimdiligin arttyrýǵa, sapaly bilimmen qamtýǵa, óńirlik saıasatty jetildirýge, eńbek naryǵynda tıimdi ekojúıe qurýǵa, saıası jań­ǵyrýǵa, adam quqyǵyn qorǵaý men ultty uıys­tyrýǵa baǵyttalǵan bastamalaryn jarııalady.

Prezıdent Qazaqstan halqyna Joldaýyn el Táýelsizdiginiń 30 jyldyǵyna arnalǵan sóz­derimen bastady.

– Bıyl egemen el bolǵanymyzǵa 30 jyl tolyp otyr. Táýelsizdik – bizdiń eń qasterli qundylyǵymyz. Qazaqstannyń Tuńǵysh Pre­zı­denti – Elbasynyń dara saıasatynyń arqasynda tabysty el retinde búkil álemge tanymal boldyq. Eń basty jetistigimiz – birtutas el bolyp, jańa memleket qurdyq, – dedi Prezıdent.

Q.Toqaev sondaı-aq ózi­niń sózinde irgemizdi beki­tip, eńsemizdi tiktegeni­mizdi, halyq­aralyq qoǵamdastyq­tyń beldi múshesine aınalǵa­nymyzdy, turaqty qo­ǵam qalyp­tastyryp, ornyqty damý jolyna tús­keni­mizdi atap kórsetti.

– Memlekettiligimizdi nyǵaı­tý úshin bir el bolyp eńbek etip jatyrmyz. Egemendik degenimiz – jalań uran men jalyndy sóz emes. Biz úshin eń mańyzdy­sy – ár azamattyń táýelsizdik ıgiligin sezine alýy. Onyń bas­ty kórinisi – eldegi beıbit ómir, qoǵamdaǵy turaqtylyq pen ty­nyshtyq. Sondaı-aq halyqtyń turmys sapasynyń jaqsarýy jáne jastardyń bolashaqqa nyq senimmen qaraýy. Barlyq bastamamyz osyǵan baǵyttalýda, – dedi Prezıdent.

Memleket basshysy Jol­daýdyń negizgi basymdyqtaryn aıqyndap, qazaqstandyq­tar­dyń ál-aýqatyn arttyrý – ózi­niń Pre­zıdent retindegi bas­ty maq­saty ekenin atap ótti. Bul maqsatqa jetý úshin 5 negizgi bastama aıtyldy.

Birinshiden, Qasym-Jomart Toqaev 2022 jyldyń 1 qań­tarynan bastap eń tómengi jalaqy mólsherin 42 500 teń­geden 60 myń teńgege deıin kóbeıtý týraly sheshimin jarııa etti. Bul shara 1 mln adamdy tikeleı qamtıtyn bolsa, eńbek etip júrgen barlyq azamatqa janama túrde áser etedi.

Ekinshiden, sońǵy 10 jylda kásiporyn ıeleriniń tabysynan 60 paıyzǵa artta qa­lyp kelgen eńbekaqy qoryn kóterý qajettigin aıtty. Osy oraıda, Úkimetke jumys­shy­lar­dyń jalaqysyn kóterý úshin bız­nesti yntalandyrý sharalaryn ázirleýdi tapsyr­dy. Ju­­mys­shylarynyń jalaqy­laryn ósirgen jumys berýshi­ler­ge satyp alýlarda jeńildik qaras­tyrylyp, memlekettik qol­daýda basymdyq beriledi.

Úshinshiden, Memleket bas­shysy mıkro jáne shaǵyn kásipkerliktiń eńbekaqy tóleý qorynan alynatyn biryńǵaı tólem kólemin 34 paıyzdan 25 paıyzǵa deıin tómendetýdi usyndy. Bul bıznestiń myńdaǵan qyzmetkerin «kóleńkeli aınalymnan» shyǵarýǵa, zeınetaqy, áleýmettik jáne medısınalyq saqtandyrý júıeleriniń tolyq qatysýshysy bolýyna yqpal etedi.

Tórtinshiden, Prezıdent 2022 jyldan 2025 jylǵa deıin mádenıet qyzmetkerleriniń, muraǵatshylardyń, kitaphana­shylar­dyń, tehnıka­lyq qyz­met­kerlerdiń, qoryqshylar­dyń, kólik júrgizýshileriniń jáne bas­qalardyń jalaqysyn jyl saıyn orta eseppen 20 paıyzǵa ósirýdi tapsyrdy. Bul bastamanyń ıgi­ligin tu­tas­taı alǵanda taǵy 600 myń qazaqstandyq kóredi.

Besinshiden, Qasym-Jomart Toqaev zeınetaqy qoryndaǵy jınaqtyń alýǵa bolatyn bóligin «Otbasy banktegi» esepshotqa aýdaryp, sol arqyly baspana satyp alýǵa ruqsat berý kerek dep sanaıdy. Onyń aıtýynsha, bul qarjyny durys jınap, saýatty paıdalaný daǵdysyna úıretedi.

Prezıdent birlesken oty­rys­qa qatysqan Parlament depýtat­­taryna árbir zań joba­synyń qyr-syryna tereń úńi­lip, ony sapaly daıyndaýǵa shaqyrdy. Halyqtyń múddesin qorǵaý jolynda árdaıym tabandylyq tanytýy kerek ekenine erekshe toqtaldy. Mem­leket basshy­synyń aıtýyn­sha, árbir sheshim eldiń su­ra­nysyn da, memlekettiń múmkindigin de eskere otyryp qabyldanýy qajet.

Qasym-Jomart Toqaev sóz sońynda memlekettik appa­rat­tyń tıimdi jumys isteýi qajet ekenin eske saldy.

– Memleket basshysynyń saıa­satyna kúmánmen qaraıtyndar, jumysyn atqara almaıtyndar, ýaqyt ótkizip bosqa otyratyndar men Prezıdenttiń tapsyrmalaryn oryndaýdan jaltaratyndar bolsa, qyzmet oryndaryn bosatýlary kerek. Biz qazir damýymyzdyń sheshýshi kezeńi­ne qadam bastyq. Memleket­tik apparat birtutas mehanızmdeı jumylyp jumys isteýge mindetti. Tek sonda ǵana biz maqsatymyzǵa jete alamyz, – dedi Prezıdent.