Memleket basshysy Qasym-Jomart Toqaev Qazaqstan halqyna Joldaýyn jarııa etip, memlekettiń tıimdiligin jáne azamattardyń ál-aýqatyn arttyrýǵa baǵyttalǵan bastamalar men mindetterdi atap ótti. Qasym-Jomart Kemeluly bilim jáne ǵylym salasy boıynsha da birqatar mańyzdy ári ózekti mindet júktedi. Prezıdent Joldaýynda kózdelgen tapsyrmalardyń ýaqtyly jáne sapaly oryndalýyn qamtamasyz etý úshin barlyq qajetti shara qabyldanady.
Joldaýda aıtylǵandaı, ýrbanızasııa jáne demografııalyq prosesterge baılanysty 2025 jyly mektepterde qosymsha shamamen 1 mln oryn qajet bolady. Bul máseleni sheshý úshin 1 myń jańa mektep salynady. Osy jyldyń ózinde 200 mektepti ashý josparlanyp otyr.
Oqýshylardyń bilimindegi olqylyqtardyń ornyn toltyrý jáne oqý baǵdarlamalaryn beıimdeý boıynsha sharalar josparlanǵan. Sonymen qatar 5 myń mektepti jańǵyrtý, pándik kabınettermen jabdyqtaý, qosymsha bilim berýge memlekettik tapsyrys bólý josparda bar. Pedagogterdiń biliktiligin arttyrýǵa erekshe nazar aýdarylady. Álem qaryshtap damyp kele jatqan jaǵdaıda bul óte mańyzdy.
Memleket basshysy áleýmettik osal toptaǵy balalardy qoldaýǵa erekshe kóńil bóldi. Olarǵa «Sıfrly tálimger» jobasy aıasynda qosymsha sabaqtar alý múmkindigi beriledi.
Qashyqtan oqytýǵa qaramastan, bizdiń oqýshylarymyz álemdik shyńdardy baǵyndyryp, halyqaralyq olımpıadalarda ótken jyldardaǵy rekordtaryn jańartty. Daryndy balalardy qoldaý úshin Prezıdenttiń tapsyrmasyna sáıkes konkýrsqa qatyspaı-aq granttar berý, sondaı-aq birjolǵy aqshalaı syılyqaqylar kózdeletin bolady.
Prezıdent sondaı-aq tolyq jınaqtalǵan aýyl mektepterin jan basyna shaqqandaǵy qarjylandyrýǵa kezeń-kezeńmen kóshirý jóninde sharalar qabyldaýdy tapsyrdy.
Esterińizge sala keteıin, 2020 jyldan bastap barlyq qalalyq mektep jan basyna qarjylandyrýǵa kóshti. Bul shara ártúrli óńirlerde qarjylandyrýdy teńestirý, materıaldyq-tehnıkalyq bazany jaqsartý, alym-salyqtarmen baılanysty táýekelderdi edáýir tómendetý, mektepterdiń qarjylyq derbestigin arttyrý jáne bıýdjet qarajatyn jumsaý tıimdiligin jaqsartýǵa múmkindik berdi. Bul bastama bilim berý jáne jekemenshik mektepter ashýǵa jeke ınvestısııalardy tartýdy yntalandyrdy.
Joldaýǵa sáıkes ǵylym salasynda da eleýli ózgerister bolmaq. Memleket basshysy jyl sońyna deıin ǵylym týraly zańnamaǵa ózgerister engizýdi tapsyrdy. Túzetýler ǵalymdarymyz turaqty jáne laıyqty eńbekaqy alýyn qamtamasyz etýge baǵyttalýǵa tıis. Ol úshin jetekshi ǵalymdardyń jalaqysy bazalyq qarjylandyrýǵa qosylýy kerek.
Biz Prezıdenttiń Qazaqstan halqyna Joldaýynda qoıylǵan barlyq mindetti iske asyrý úshin josparly jáne júıeli jumys isteıtin bolamyz.
Ashat AIMAǴAMBETOV,
Bilim jáne ǵylym mınıstri