Baıypty bastamalar

Qujatta naqty kórsetilgen 5 negizgi bastamanyń ishinde bizdiń kóńilimizden shyqqany – Prezıdenttiń mádenıet qyz­met­kerleri, muraǵatshylar, kitap­hanashylar, tehnıkalyq qyzmet­kerler, qoryqshylar, kólik júr­gizýshileri sekildi qarapaıym eń­bek adamdarynyń jalaqysyn jyl saıyn orta eseppen 20 pa­ıyz­ǵa ósirý týraly tapsyrmasy. Mem­leket basshysy bul bastamanyń ıgiligin tutastaı alǵanda 600 myń qazaqstandyq kóretinin atap ótti.

Sonyń ishinde bilim salasyn­daǵy mádenı, medısınalyq, tehnıkalyq qyzmetkerlerdiń, kitaphanashylardyń aılyq jalaqysyn kóterýge qatysty óte qajetti, ońtaıly usynystar aıtyldy. Biz bul máseleni depý­tattyq saýal arqyly kóter­genbiz. О́ıtkeni óńirlerdi arala­ǵan kezimizde dál osy sanattaǵy eńbek adamdary mardymsyz eń­bek­aqylary jóninde másele kóterip, jaǵdaılaryn aıt­qan edi. Joldaýda osy qyzmet­ker­lerdiń jalaqysy kezeń-kezeń­men kóteriledi dep naqty aıtyldy. Bul – óte quptarlyq jaıt.

Eń bastysy – bilim salasy aldaǵy ýaqytta básekelestikke qabilettilik turǵysynan bir qadam alda júrýi kerek ekenine erekshe mán berildi. Bul turǵyda sıfrly tehnologııalardy tereń damytý qajettigi aıtyldy. Bul – birinshi másele.

Ekinshi másele – qazirgi tańda bilim berý uıymdaryndaǵy oryn tapshylyǵy 200 myńnan joǵary. Aldaǵy 5 jylda bul san mıllıonǵa jetýi múm­kin. Osyǵan oraı Nur Otan partııa­synyń Jol kartasynda aldaǵy ýaqytta 800 mektep salý esebinen úsh aýysymdy jáne apattyq jaǵdaıdaǵy mektepter problemasyn sheshý qarastyrylǵan bolatyn. Endi jańadan salynatyn mektepter sanyn myńǵa jetkizý uıǵarylyp otyr. Bul – óte durys sheshim ekendigi sózsiz. 

Qosymsha bilimdi damytý da úlken másele. Aıtalyq, bala óz mektebinen basqa jerge barmaı, jolǵa ýaqytyn ketirmeı, bilim alyp otyrǵan oshaǵynda ózine qajetti daǵdylaryn, ǵylymǵa, shyǵarmashylyqqa jol ashar qasıetterin damytatyn bolsa, osynyń ózi tárbıe salasyndaǵy kóptegen máselelerdi sheshýge negiz bolar edi. Sondyqtan da óz basym myń mektep salý bastamasyn qýana qabyldadym.

Juldyz SÚLEIMENOVA,

Májilis depýtaty