Mektepter sanıtarlyq talapqa saı

Bıyl óńir mektepterinde 110 myń oqýshy bilim alady. Ob­lys­tyq bilim basqarmasynyń basshysy Záýre Baımenovanyń aıtýynsha, jańa oqý jyly bilim berý úderisine birqatar ózge­ris­ter engiziledi.

– Eń aldymen ár sabaqtyń ýaqyty endi burynǵydaı 40 mınýt emes, 45 mınýt bolady. Bul másele Bilim jáne ǵylym mınıstrliginde talqylanyp, ma­quldandy. Sondaı-aq bes kún­dik oqý aptasy saqtalady, biraq oqý úderisin uıymdastyrý barysynda sanıtarlyq normalardy saqtaýǵa qatysty qandaı da bir kúrdeli máseleler týyndap jatqan jaǵdaıda, alty kúndik oqý aptasyna kóshirilýi múmkin. Bul kóbine-kóp qalalyq mek­tepterge qatysty. Men taıaý­­da iri mektepterdiń dırektor­la­rymen kezdesý ótkizdim, onda osy máseleni sóz ettik. Bas­taýysh synyptar 5 kún, al 7-synyptan nemese 8-synyptan ári qaraı keıbir pánder senbi kúnderi oqytylýy múm­kin. Bul mektepter keıbir pán­der­di qa­shyq­tan oqytýy da múm­kin. Qaı pándi onlaın oqytý qa­jet­tigin mektep dırektorlary sheshedi, – dedi Z.Baımenova.

Basqarma basshysynyń aıtýynsha, bıyl mektep kıimine qatysty talaptar burynǵysha saqtalady. Alaıda ata-ananyń balasyna mektepke arnalǵan kıim satyp alýǵa múm­kindigi bolmasa, oqýshyǵa jalpy ádepke saı kıimmen sabaqqa kelýge ruq­sat etiledi.

Bıylǵy oqý jyly bi­lim be­rý oshaq­­taryndaǵy sanıtarlyq taza­lyq­ty saqtaý úshin bıýdjetten 105 mln teńge bólinip otyr. Muǵalimder men tárbıeshilerdiń deni vaksına qabyldaǵan.

Búginde oblys mektepterinde jumys isteıtin 29 288 adam ekpe alǵan. 3 myńnan astam adamnyń densaýlyǵyna baılanysty vakına qa­byldaýǵa bolmaıdy degen ruqsat qaǵazy bar. Mektep qyzmetkerleri, peda­gogter men ata-analar mektepterge Ashyq qosymshasy arqy­ly kiredi. 18 jasqa tolmaǵan mek­tep oqýshylary men kolledj stý­dent­teri bilim ǵımarattaryna Ashyq qo­­symshasyna tekse­ril­meı-aq kire alady, – dedi ob­ly­s­tyq bilim bas­qar­ma­synyń basshysy.

Qostanaı oblysy