Bıylǵy qurǵaqshylyq Qostanaı óńirindegi sharýashylyqtarǵa ońaı tıgen joq. Dıqandar dán sińirý naýqanyn oıdaǵydaı aıaqtaǵanymen, jaz jańbyrsyz bolyp, aptap ystyqtan kóktemde egilgen dánniń 40 paıyzǵa jýyǵy kúıip ketti. Endi biraz sharýashylyqtar nesıe tóleminiń merzimin kelesi jylǵa shegerýdi surap otyr.
Olardyń ishinde kóktemgi naýqanda janarmaı men tuqymdy qaryzǵa alǵan dıqandar, lızıng boıynsha tehnıkasyn jańartqan sharýa qojalyqtary, sondaı-aq memlekettik baǵdarlama boıynsha nesıege mal alǵan fermerler bar.
Bul másele Qostanaı oblystyq kásipkerler palatasynda shilde aıynda ótken jıynda da sóz bolǵan. Palata ókilderi ol joly sharýashylyq basshylaryn «qoldaýsyz qalmaısyzdar, memleket kúzge qaraı bul tyǵyryqtan shyǵýdyń qandaı da bir jolyn usynýy tıis» degen ýádemen qaıtarǵan. Aıtqandaı-aq, kásipkerler palatasy taıaýda ǵana bereshegi bar fermerlerdiń nesıe tóleminiń merzimi shegeriletinin málimdedi.
– Biz óz usynystarymyzdy «Atameken» UKP ortalyq apparatyna jibergen edik. Qazirdiń ózinde solardyń ishinen ekeýi oń sheshim tapty degen jaýap alyp otyrmyz. Atap aıtqanda, bıyl «NUH «Báıterektiń» qarjylyq ınstıtýttarynan alǵan nesıeler men «Azyq-túlik korporasııasy» AQ-ǵa forvardtyq satyp alý sharttary boıynsha aýyl sharýashylyǵy ónimderin jetkizý boıynsha mindettemelerdiń oryndalý merzimi uzarady. Qazir jergilikti atqarýshy organdar atalǵan memlekettik qoldaý sharalaryn paıdalanǵysy keletin aýylsharýashylyq taýaryn óndirýshilerdiń tizimin jasap jatyr, – dedi oblystyq kásipkerler palatasy AО́K bóliminiń bastyǵy Qaıyr Aısın.
Qostanaı oblysy