Táýelsizdiktiń 30 jyldyǵyn merekeleý aıasynda ulttyq sport túrlerinen respýblıkalyq «Uly dala rýhy» festıvali ótýde. Kókpar, teńge ilý, aýdaryspaq, jamby atý, qazaq kúresi, toǵyzqumalaq, asyq atý sııaqty sport túrleri boıynsha saıystar komandalyq tártippen uıymdastyrylyp jatyr.
Mádenıet jáne sport mınıstrliginiń Sport jáne dene shynyqtyrý isteri komıteti, sonymen qatar «Ulttyq jáne at sporty túrleri ortalyǵy» RMQK muryndyq bolǵan jarystyń kórigi qyzyp jatqanyna bir aptaǵa jýyqtap qalǵanyn aıta keteıik. Eki kezeńnen turatyn festıval eki aıdan astam ýaqytqa sozylýǵa tıis. Alǵashqy kezeńdegi aımaqtyq irikteý jarystary tórt aımaqta ótedi. Teriskeıdegi tórt oblystyń jampozdary jarysqan alǵashqy kezeń saıystary ótken aptada Kókshetaý qalasynda ótti. Osy aptanyń ishinde ózge oblystardyń da kezegi kelip tur. Aımaqtardaǵy irikteý jarystary qazan aıynyń basynda márege jetedi. Elimizdegi 14 oblys, 3 qala komandalary arasynan úzdik shyqqandar festıvaldiń sheshýshi kezeńinde, ıaǵnı fınalda óner kórsetedi.
Ulttyq sport túrlerinen «Uly dala rýhy» respýblıkalyq festıvaliniń soltústik óńiriniń jeńimpaz komandalary anyqtalǵanyn joǵaryda aıtyp óttik. Batys aımaqtyq irikteý jarystary aıasynda 26-28 tamyzda Oral qalasynda kókpar, teńge ilý, aýdaryspaq, jamby atýdan sportshylar qalalyq atshabarda synǵa tússe, qazaq kúresi men asyq atýdan – joǵary sporttyq sheberlik mektebinde, toǵyzqumalaqtan – oqýshylyr saraıynda básekeler ótti. Batys aımaq irikteý jarystaryna Batys Qazaqstan, Mańǵystaý, Qyzylorda, Atyraý, Aqtóbe oblystarynan 225 sportshy qatysty.
«Egemen-aqparat»