Bıylǵy jyl Mańǵystaý oblysynyń aýyl sharýashylyǵy úshin ońaıǵa soqpady. Oblystaǵy qurǵaqshylyqtyń jalǵasýyna baılanysty mal azyǵy jetispeýshiligi oryn alyp, aýyl sharýashylyǵy qatty zardap shegýde.
Osy jaǵdaıdan habardar bolǵan «QazMunaıGaz» UK AQ enshiles kompanııasy «Qazaqteńizkólikfloty» UTKQK ujymy únsiz qalmaı, biraýyzdan oblys fermerlerine kómek kórsetý týraly sheshim qabyldady.
Aıta ketý kerek, buǵan deıin de Ulttyq teńiz tasymaldaýshysy qyzmetkerleri qıyn jaǵdaıǵa tap bolǵan azamattarǵa birneshe ret kómek kórsetken edi. Bul joly kompanııa Mańǵystaý oblysynyń aýyldaryna mal azyǵyn satyp alý men jetkizý úshin erikti qarajat jınaý týraly meıirimdilik aksııasyn uıymdastyrdy. Sonymen, aksııa aıasynda QTKF qyzmetkerleri aımaqtaǵy fermerlerge kómektesý úshin 3 mln teńgege jýyq qarajat jınady.
QTKF uıymshyl ujymynyń úılesimdi jumysynyń nátıjesinde Batys Qazaqstan oblysynyń aýyl sharýashylyǵy qyzmetkerlerimen kelisimge qol jetti. Batys Qazaqstan oblysy Báıterek aýdanynyń «AVANGARD» JShS agrarlyq kompanııasynyń qoldaýymen Mańǵystaý oblysynyń Shetpe aýylyna tórt avtopoıyzben qajetti pishen jetkizilip, odan ári fermerlerge taratylýy úshin aýdan ákimdigine tabystaldy.
«Egemen-aqparat»