Sochıde ótetin Olımpıada oıyndary kezinde AQSh qarýly kúshteriniń eki áskerı korabli Qara teńiz aýmaǵynda kúzetke turyp, shuǵyl jaǵdaılar oryn ala qalsa, birden aralasa ketetin bolady.
Sochıde ótetin Olımpıada oıyndary kezinde AQSh qarýly kúshteriniń eki áskerı korabli Qara teńiz aýmaǵynda kúzetke turyp, shuǵyl jaǵdaılar oryn ala qalsa, birden aralasa ketetin bolady.
Pentagonnyń resmı ókili kontr-admıral Djon Kerbıdiń aıtýynsha, óz eliniń Qara teńiz boıyn boılap júzetin áskerı korablderi men Germanııada turǵan ushaqtary qajettilik týatyn bolsa, Sochıdegi amerıkalyqtardy qater qursaýynan alyp shyǵady. CNN telekompanııasynyń málimeti boıynsha, «ushaqtar Sochıge eki saǵattyń ishinde jetip kele alady». Biraq mundaı operasııalar úshin «mindetti túrde reseılikter tarapynan ruqsat suralady».
Djon Kerbıdiń sózine qaraǵanda, Qurama Shtattar Reseı úkimetine Qysqy Olımpııalyq oıyndardy ótkizýge daıyndyq kezinde óziniń jan-jaqty qoldaýyna súıenýdi usynǵan bolatyn. «Eger Reseı úkimetimen konsýltasııa júrgizý barysynda áldeqandaı tótenshe týyndaǵan jaǵdaılarǵa baılanysty járdem kerek etilse, biz kúshimiz ben Qara teńizde júrgen eki kememizben birge, basqa da áskerı-áýe jáne áskerı-teńiz quraldarymyzdy iske qosýǵa daıynbyz», dedi ol.
Budan buryn Pentagonnyń basshysy Chak Heıgel eger Sochı Olımpııalyq oıyndaryn ótkizý kezeńinde reseılikter jaǵynan qaýipsizdikti qamtamasyz etýge baılanysty ótinish bolyp jatsa, oǵan qolushyn berýge ázir ekenderin málimdegen bolatyn.
Qańtardyń 19-y kúni Reseıdiń prezıdenti Vladımır Pýtın Sochıdegi oıyndar qaýipsizdigin saqtaýdyń óte mańyzdy da jaýapty másele ekenin aıtty. Ol osydan keıin Qara teńiz jaǵasyndaǵy qalaǵa kelip, mundaǵy jaǵdaımen tanysty. Ázirge qaýip shaqyratyndaı dabyldy ahýal joq.
Damır QOJAMQUL.