Qazaqstanda alǵash ret ústel tennısinen «2021 ITTF Kazakhstan International Open» halyqaralyq týrnıri ótedi, dep habarlaıdy Egemen.kz.
15-19 qyrkúıek aralyǵyna josparlanǵan jarys Qaraǵandy qalasyndaǵy jańa «Saryarka» ústel tennıs ortalyǵynda uıymdastyrylady.
Baıraqty básekege Avstrııa, Saýd Arabııasy, Úndistan, Belarýs, Reseı, О́zbekstan, Qyrǵyzstan, Mońǵolııa men Qazaqstannan 70-ten astam sportshy qatysady. Júlde qory 30 myń AQSh dollaryn quraıtyn bul bedeldi jarys ITTF halyqaralyq ústel tennısi federasııasynyń TMD elderindegi bıylǵy jalǵyz reıtıngtik týrnır sanalady.
Federasııa atap ótkendeı, Qaraǵandydaǵydaı ústel tennısiniń ortalyqtary elimizdiń basqa jeti oblysynda salynýda. Jalpy aýdany 4000 sharshy metrden asatyn «Saryarka» ortalyǵynyń quramynda 18 tennıs ústeli bar oıyn bólmesi jáne Halyqaralyq ústel tennısi federasııasynyń barlyq tehnıkalyq talaptaryna sáıkes keletin 9 tennıs ústeli bar jattyǵý zaly bar.
Eki Olımpıada oıyndarynyń qatysýshysy jáne ulttyq quramanyń kóshbasshysy Kırıll Gerasımenko týrnırge Qazaqstan quramasynyń quramynda qatysady. Týrnırdi Qazsport telearnasy men Halyqaralyq ITTF federasııasynyń resmı saıty tikeleı kórsetedi.