Jańa oqý jylynyń alǵashqy kúni Qostanaı oblysynyń eki birdeı eldi mekeninde qazaq mektebi ashyldy. Tobyl beketinde Bilim kúni merekesinde esigin aıqara ashqan jańa mektep bıyl 130 bala qabyldaıdy. Al Qarasý aýdanynyń ortalyǵynda paıdalanýǵa berilgen qazaq mektebinde 320 bala oqıtyn bolady. Jalpy, soltústikte qazaq mektepteriniń azdyǵy jıi aıtylyp júrgen másele. Biraq batpandap kirgen keseldiń mysqaldap shyǵatyny sııaqty, Tobyl óńirindegi memlekettik tilde bilim beretin mekemeler sany jyl ótken saıyn eselenip keledi.
Jańa bilim ordasynyń qurylysy osydan eki jyl buryn bastalǵan. Bıýdjetten bólingen 1 mlrd 285 myń teńge qarjyǵa salynǵan jańa mektepte balalarǵa sapaly bilim berýdiń barlyq múmkindigi qarastyrylǵan: ınteraktıvti qurylǵylarmen qamtylǵan kabınetter, yńǵaıly sheberhanalar, oqý zaly men kitaphana, zamanaýı sport zaly bar. Mektep ǵımaraty ınklıýzıvti oqytýǵa da ıkemdelip salynypty, esikteri keń, kireberisinde yńǵaıly pandýsy, arnaıy jabdyqtalǵan sanıtarlyq toraptary bar. Zamanaýı mekteptiń aldynda ótken saltanatty jıynǵa qatysqan aımaq basshysy Arhımed Muhambetov ustazdardy, oqýshylar men ata-analardy jańa oqý jylynyń bastalýymen quttyqtady.
– Búgin Qostanaı oblysynda 110 myń oqýshy Bilim kúnin atap ótýde, sonyń ishinde 12 myń baldyrǵan alǵash ret mektep tabaldyryǵyn attap otyr. Sizder úshin búgingi kún zamanaýı jabdyqtalǵan, sońǵy úlgidegi jańa mekteptiń ashylýymen mańyzdy bolmaq. Búgingi mektepterdiń barlyǵy qazirgi zamanǵa saı jabdyqtalyp, oqýshylardyń sapaly bilim, sanaly tárbıe alýyna barlyq jaǵdaı jasalatyn bolady. El Prezıdenti Qasym-Jomart Toqaev elimizdiń básekege qabilettiliginiń negizgi faktory – bilim ekenin aıtyp keledi. Al bizdiń basty mindetimiz – óskeleń urpaqtyń halyqaralyq standarttarǵa saı keletin sapaly bilimge teń qol jetkizýi úshin jaǵdaı men múmkindik jasaý. Qymbatty balalar! Jańa bilim ordasy sizderdi ana tilin, týǵan ólke tarıhyn, halqymyzdyń salt-dástúrlerin biletin, qasterlep, dáripteıtin bilimdi ári patrıot azamat etip tárbıelep shyǵarady degen senimdemin. О́ıtkeni ótkendi biletin jáne ony maqtan tutatyn adamdar ǵana kemel bolashaqty qura alady, – dedi A.Muhambetov.
Qazaq mektebiniń ashylýy – Qarasý turǵyndary úshin úlken qýanysh. Munyń lebi sóz alǵan ata-analardyń jyly lebizinen baıqalyp turdy. Sondaı-aq aýyl turǵyndarynyń birazy jańa mektepke uly aǵartýshy Ybyraı Altynsarınniń esimi berilse degen tilegin jetkizdi.
– Bıyl meniń ulym Tórehan Nurıslam birinshi synyp tabaldyrǵyn attap otyr. Jańa mekteptiń ashylýy barlyǵymyz úshin de úlken oqıǵa. Birazdan beri balalardyń bolashaǵyna alańdaýly edik. Búgin – kópten beri sheshilmeı kele jatqan kúrmeýli máseleniń túıini tarqatylǵan kún. Jańa mektep salyp bergen el basshylaryna alǵys aıtamyz. «Maǵan jaqsy muǵalim bárinen de qymbat, óıtkeni muǵalim – mekteptiń júregi», dep Ybyraı atamyz aıtqan edi. Bıyl jalpy alǵash mektep ashqan uly ustaz Y.Altynsarınniń týǵanyna 180 jyl tolyp jatyr. Jerlesimizdi ulyqtaý maqsatynda ashylyp jatqan mektebimizge Y.Altynsarınniń esimi berilse eken degen usynysymyz bar edi, – dedi Qarasý aýylynyń turǵyny Esimhan Tórehanuly.
Saltanatty sharadan soń A.Muhambetov Qarasýda «Rýhanı jańǵyrý» baǵdarlamasy aıasynda muǵalimderge arnalyp turǵyzylyp jatqan turǵyn úılerdiń qurylysymen tanysty. Bul úılerdiń jalpy quny 48 mln teńge turady. Aýdan ákiminiń orynbasary Erlan Baljaqaevtyń aıtýynsha, qurylys jumystary aıaqtalǵan soń eki páterli úılerge otbasy bar jas muǵalimder qonystanatyn bolady.
Oblys ákiminiń aıtýynsha, mektepterdi jańǵyrtýdyń 2021-2025 jyldarǵa arnalǵan josparyna sáıkes, bıyl Qostanaı oblysynda 82 aýyldyq mektep jańǵyrtylady. Oǵan barlyǵy 2,9 mlrd teńge qarjy qarastyrylyp otyr. Oblystaǵy bilim oshaqtaryn jańǵyrtý barysynda búginge deıin 235,2 mln teńgege oqýshylardy mektepke tasymaldaıtyn avtobýstar satyp alynyp, 10 mln teńgege mektep ashanalarynyń jabdyqtary, 50,8 mln teńgege kitaphanalar men 165,9 mln teńgege mektep jıhazdary jańartylǵan. Sondaı-aq 87,7 mln teńgeniń sporttyq kerek-jaraqtar satyp alynyp, 140,3 mln teńgege pándik kabınetter jabdyqtalǵan. 2025 jylǵa qaraı jańǵyrtylǵan mektepterdiń sany 325-ke jetpek.
Búginde oblysta úsh aýysymdy nemese apatty jaǵdaıda turǵan mektepter joq. Kerisinshe, birqatar jańa mektep ǵımarattaryn salý josparda tur. Máselen, bıyl Qostanaı qalasynda 2 mekteptiń qurylysy bastaldy. Munyń syrtynda, oblys ákimi 2025 jylǵa deıin 7 640 oryndyq 13 jańa mektep salynatynyn, al kelesi jyly 7 mekteptiń qurylysy aıaqtalýy tıis ekenin aıtyp otyr. Bul mektepterdiń nesheýi memlekettik tilde bilim beretini qazirshe belgisiz. Bir anyǵy, 2022 jyly Qostanaı qalasynda taǵy bir qazaq mektebi paıda bolady. О́ıtkeni oblys ortalyǵyndaǵy aralas synypty №15 mektep on shaqty jyldan beri orys synyptaryna bala qabyldaýyn toqtatqan. Bıyl orys tilinde bilim alatyn sońǵy 11-synypty túletse, bul bilim ordasy da aldaǵy jyldan bastap basy bútin qazaq mektebine aınalady.
Qostanaı oblysy