Búginde Taraz qalasynda koronavırýs indetinen qorǵaný maqsatynda 14 ekpe egý pýnkti jumys isteıdi. Sondaı-aq osy ýaqytqa deıin kóne shahar turǵyndarynyń 61,1 paıyzy qaýipti indetke qarsy vaksına alǵan.
Al ujymdyq ımmýnıtet qana qaýipti indetpen kúresýde kómektesetinin eskersek, qazirgi kezde vaksına alý asa mańyzdy bolyp otyr. Bul úshin oblys ortalyǵyndaǵy barlyq emhanada tegin vaksınalaý uıymdastyrylýda. Aldaǵy ýaqytta da qala turǵyndaryna atalǵan másele boıynsha túsindirý jumystary jalǵasatyn bolady.
Osy oraıda, Taraz qalasynda etnomádenı birlestikterdiń basshylary qala turǵyndarymen kezdesti. Kezdesý barysynda karantın talaptaryn qatań saqtaý men vaksına qabyldaýdyń adam ómiri úshin mańyzdylyǵy týraly áńgime órbidi. Aqparattyq túsindirý jumystary barysynda orys, dúngen, ýkraın, ózbek, uıǵyr jáne tájik etnomádenı birlestikteriniń óńirdegi jetekshileri de vaksına alýdyń adam men qoǵam úshin mańyzdylyǵyna toqtaldy.
Túsindirý jumystarynyń sońynda «Taraz qalasynyń ózbek ortalyǵy» qoǵamdyq birlestiginiń basshysy Abdýrahman Zaınýtdınov jáne ózbek dıasporasynyń ókilderi vaksına aldy. «Búginde ekpeni qaladaǵy kez kelgen emhanada alýǵa bolady. Sondaı-aq qala boıynsha iri vaksınalaý ortalyqtary da ashylǵan. Bizdiń ekpeni esh kedergisiz alýymyzǵa barlyq jaǵdaı jasalýda. Sondyqtan osyndaı múmkindikti keńinen paıdalanýymyz kerek», deıdi ol.
Jambyl oblysy