Rıdderde úsh balanyń anasy aıaýsyz óltirildi, dep habarlaıdy Egemen.kz.
26 tamyzda tańerteń erte úıden jumysqa shyqqan, biraq iz-tússiz joǵalǵan qala ákimdigi qyzmetkeri týraly habar qala turǵyndaryn alańdatty. Uıaly telefony sóndirýli bolǵan anany úıde 8 jastan 11 jasqa deıingi úsh bala kútip otyrdy.
«Keshke orman alqabyn tekserý kezinde, áıeldiń jumysqa baratyn joldardyń birinen alys emes jerde onyń máıiti tabyldy. Medısınalyq saraptama qorytyndylary boıynsha áıel denesinde tunshyǵý jáne birneshe pyshaq jaraqattary túrindegi zorlyq-zombylyq belgileri bar ekendigi anyqtaldy. Oqıǵa ornyna oblys ortalyǵynan polısııa departamentiniń, prokýratýranyń basshylyǵy, sondaı-aq krımınaldyq polısııa qyzmetkerleri dereý keldi», dep habarlady oblystyq PD.
Birneshe kúnnen keıin kúdikti anyqtalyp, ustaldy. Ol buryn birneshe ret sottalǵan 34 jastaǵy er adam bolyp shyqty. Onyń bul qylmysqa barý sebebi - áıeldiń kúmis áshekeıleri men sómkesin ıemdený boldy.
«Qazir kúdikti qamaýǵa alynyp, qylmysy QR QK 99 jáne 192-baptary boıynsha saralanady. Atalǵan baptardyń sanksııalary 20 jylǵa deıin nemese ómir boıy bas bostandyǵynan aıyrýdy kózdeıdi», dedi ShQO PD bastyǵynyń orynbasary Talǵat Shaıahmetov.
Anasyz qalǵan búldirshinder jaqyn týystarynyń qamqorshylyǵyna ótti. Jergilikti atqarýshy organdar qajetti járdem kórsetýde.