Koronavırýs juqtyrý jaǵdaılarynyń tómendeýine baılanysty qalada kovıdtik stasıonarlar kezeń-kezeńimen jabylatyn bolady. Bul týraly qalalyq qoǵamdyq densaýlyq saqtaý basqarmasy onlaın-brıfıng barysynda málimdedi, dep habarlaıdy Egemen.kz elorda ákimdiginiń resmı saıtyna silteme jasap.
«KVI jaǵdaılarynyń tómendeýine baılanysty qalalyq qoǵamdyq densaýlyq saqtaý basqarmasy aýrýhanalardy jabý týraly sheshim qabyldady. Sońǵy 2 kúnde biz 370 tósektik 3 kovıdti stasıonardy japtyq, bul qalalyq psıhıkalyq densaýlyq ortalyǵy, UQK gospıtali jáne basqa da eki aýrýhana», dedi qalalyq qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova.
Onyń aıtýynsha, kelesi aptada epıdemıologııalyq jaǵdaıǵa baılanysty kovıdtik stasıonar retinde tartylǵan qalanyń taǵy eki aýrýhanasynda ınfeksııalyq tósekter jabylady.
«Bul 366 tósektik №3 kópbeıindi qalalyq aýrýhananyń klınıkalyq jáne akýsherlik blogy jáne akademık N.D. Batpenov atyndaǵy 112 tósektik Travmatologııa jáne ortopedııa ulttyq ǵylymı ortalyǵy», dep qosty spıker.
Sonymen qatar, ol azamattardy qaladaǵy epıdemıologııalyq jaǵdaıdyń jaqsarýyna qaramastan, karantın sharalaryn saqtaýǵa shaqyrdy.
«Men azamattardyń nazaryn qaladaǵy epıdemıologııalyq jaǵdaıdyń jaqsarýyna qaramastan, vırýs esh jerde joıylmaǵanyna jáne áli bas tartqysy kelmeıtinine aýdarǵym keledi. Joǵaryda atap ótkenimizdeı, osymen ekinshi jyl qatarynan syrqattanýshylyqtyń joǵary deńgeıi jazǵy kezeńge, keıde demalystarǵa, jazǵy demalystarǵa baılanysty keledi. Eń bastysy - barlyq sanıtarlyq normalardy saqtaý jáne vaksınasııa. Vaksınasııanyń kómegimen biz aýrýdyń deńgeıin tómendetip, ınfeksııanyń taralýyn toqtata alamyz», dedi Álııa Rústemova.