Sýǵa shomylý maýsymy kezinde TJM qutqarýshylary 328 adamdy, onyń ishinde 61 balany qutqaryp qaldy, dep habarlaıdy Egemen.kz vedomstvonyń baspasóz qyzmetine silteme jasap.
Adamdardyń sýdaǵy qaýipsizdigin qamtamasyz etý maqsatynda TJM barlyq deńgeıdegi ortalyq jáne jergilikti atqarýshy organdarmen ózara is-qımyl jasaı otyryp, sýda tótenshe jaǵdaılardyń týyndaý qaýpin azaıtý boıynsha aldyn ala uıymdastyrýshylyq jáne praktıkalyq is-sharalar keshenin daıyndap úzdiksiz ótkizdi.
«Shomylýǵa ruqsat etilgen 538 oryn anyqtaldy, bul ótken jylmen salystyrǵanda 93 orynǵa kóp. TJM jergilikti atqarýshy organdarmen jáne jeke menshik obektilermen birlesip 454 qutqarý jáne 66 medısınalyq beketter qurdy. Asa qaýipti ýchaskelerde 59 mobıldi qutqarý beketteri qoıyldy. Sý aıdyndarynda 6655 qaýipsizdik belgileri men 1656 aqparattyq stendter ornatyldy, onda adamdardyń qaza bolý sebepteri men oqıǵalarǵa yqpal etken jaǵdaılar kórsetilgen. Halyq arasynda 1 mln 139 myń 935 dana úgit ónimi (býkletter, paraqshalar) taratyldy, halyqpen 5314 jıyn ótkizildi. Jergilikti atqarýshy organdarmen ózara is-qımylda 32085 bala júzýge úıretildi. Aldyn alý jumystaryna 17943 volonter tartyldy», dep jazady TJM baspasóz qyzmeti.
ÁQBtK-niń 440-baby «Qoǵamdyq oryndarda bolý erejelerin buzý» boıynsha 4788 adam ákimshilik jaýapkershilikke tartyldy, sondaı-aq ÁQBtK-niń 364-baby «Ortaq sý paıdalaný qaǵıdalaryn buzý» boıynsha 5781 adamǵa eskertý jasalyp, 172 adamǵa aıyppul salyndy.
Aǵymdaǵy jyly sý aıdyndarynda adam óliminiń aldyn alýdyń jańa ádisteri qoldanyldy. Avıasııalyq jáne temirjol kóliginiń mýltımedııalyq jabdyqtary sý aıdyndaryndaǵy qaýipsizdik erejelerin saqtaý boıynsha úgit-nasıhat ónimderin taratý úshin paıdalanyldy.
«2Gis» kartografııalyq platformasynda elimizdiń barlyq óńirlerinde sý aıdyndarynda shomylýǵa tyıym salynǵan jáne ruqsat etilgen oryndardyń derekteri ornalastyrylǵan. Alaıda, TJM men memlekettik organdar qabyldaǵan sharalarǵa qaramastan, shomylý maýsymy kezeńinde sý aıdyndarynda qarapaıym qaýipsizdik erejelerin saqtamaǵandyqtan 319 adam, onyń ishinde 95 kámeletke tolmaǵan adam sýǵa ketti.
Sý aıdyndarynda balalardyń qaza bolý jaǵdaılarynyń 82%-ynda balalar ata-analarynyń qaraýynsyz boldy. Qaza bolýdyń negizgi sebepteri óz kúshterin jete baǵalamaý - 170 jaǵdaı, mas kúıinde shomylý – 73 jaǵdaı, sý aıdynyna qulaý – 68 jaǵdaı, júze almaý - 34 jaǵdaı, balyq aýlaý kezinde qaýipsizdik qaǵıdalaryn buzý – 24 jaǵdaı, sýǵa batýshylardy qutqarý kezinde – 13 jaǵdaı jáne júzý quraldaryn paıdalaný kezinde qaýipsizdik qaǵıdalaryn buzý – 8 jaǵdaı bolyp tabylady.
Sýǵa shomylý maýsymynyń aıaqtalýyna qaramastan, qutqarýshylar sý aıdyndarynda adamdardyń ólimin aldyn alý boıynsha profılaktıkalyq jumysty jalǵastyrýda.