Bıyl Torǵaı dalasyndaǵy «Alty Saı» ekosaıabaǵyna qoqıqaz qondy. Qazaqstan bıoalýantúrlilikti saqtaý qaýymdastyǵynyń málimetinshe, elimizde bul qustyń jalǵyz-aq túri bar, ol – qyzǵylt qoqıqaz. Mamandar bul kerbez qanattylardyń Torǵaıdan tórt júz shaqyrym qashyqtyqta jatqan Qorǵaljyn memlekettik qoryǵyndaǵy Teńiz kólinen ushyp kelýi múmkin dep boljaıdy.
Qoqıqaz óziniń kerbez qımyl-qozǵalysy men mańǵaz turysymen ǵana ıspan halqynyń álemge áıgili «Flamıngo» bıine negiz bolǵany barshaǵa aıan. Bul qustar óte saq ári úrkek keledi, kóbine adam aıaǵy basa bermeıtin sýly jerlerdi mekendeıdi. Bir úrikken kóline 4-5 jylǵa deıin qaıtyp qonbaı qoıady eken. Qoqıqaz – boıshań, uzyn sıraqty qus ári kózi qııadaǵyny shalatyn qyraǵy keledi.
«Alty Saı» ekosaıabaǵyna qonǵan qyzǵylt qoqıqazdar jazdaı osy mańdy mekendeıdi. Qaýyrsyndaryn túletip, balapan basyp shyǵarady. Bir qoqıqaz eki jumyrtqaǵa deıin basyp shyǵarýy múmkin. Qorek tabý úshin ushyp ketken ana qoqıqaz qaptaǵan qustyń ishinde júrgen óz balapanyn daýsynan tanıdy eken. Qoqıqaz balapandarynyń qanaty qataıyp, ábden ál jınap alǵan soń, kúzge salym Ázerbaıjan, Túrikmenstan jáne Iran elderindegi qystaýlaryna ushyp ketedi.
Qostanaı oblysy