Dúnıe júzinde epıdemııalyq ahýal áli de eńseriler emes. Vırýs juqtyrǵandar sany azaımaı tur. Osyǵan baılanysty kóptegen el vaksına salýdy jedeldetýge talpynyp, tyrysyp jatyr.
Germanııa densaýlyq saqtaý mınıstri halyqty jappaı vaksına saldyrýǵa shaqyrdy. Onyń aıtýynsha, ekpe alý kórsetkishi jaqsarmasa, jyl sońyna deıin eldegi aýrýhanalar naýqastarǵa tolýy múmkin. Ázirge Germanııa turǵyndarynyń tek 61 paıyzy koronavırýsqa qarsy vaksınanyń eki dozasyn alǵan. Bul Eýropa elderimen salystyrǵanda tómen. О́kinishke qaraı, atalǵan elde vaksına salǵyzǵandar sany birneshe aptadan beri tómendep keledi.
Ulybrıtanııa bıligi kelesi aptada 12-15 jastaǵy jasóspirimderge koronavırýsqa qarsy vaksına salýǵa daıyn. Bul týraly Anglııanyń Bas sanıtarlyq dárigeri Krıs Ýıttı málimdedi. Áıtse de, ázirge bılik ókilderi vaksına saldyrý-saldyrmaý quqyǵyn ata-analarǵa bermek. Premer-mınıstr Borıs Djonson aldaǵy ýaqytta osyǵan baılanysty Parlamentte ótetin talqylaýǵa qatysady.
Bahreın de ekpege erekshe ekpin berip otyr. El bıligi Sputnik V vaksınasyn tolyqtaı alǵandarǵa kúsheıtkish doza qoldanýǵa ruqsat etti. Osylaısha, eki doza alǵandar taǵy da bir márte atalǵan preparatty saldyra alady.
Indonezııada vaksınadan daý týdy. Taıaýda prezıdenttiń koronavırýsqa qarsy vaksına alǵany jónindegi sertıfıkat jarııalanyp ketken. Sodan keıin turǵyndardyń jeke medısınalyq málimetteriniń qaýipsizdigine alańdaǵandar sany kóbeıdi. О́ıtkeni mundaı aqparat bylaıǵy jurtqa jarııa etilmeýi tıis. Sarapshylar ekpege arnalǵan baǵdarlama buzylýy múmkin ekenin alǵa tartady.
Túrkııa 6 qyrkúıekten bastap koronavırýspen kúresýdiń jańa sharalaryn engizdi. Olardyń arasynda qalaaralyq avtobýstarda, poıyzdarda jáne basqa da qoǵamdyq kólikte vaksına almaǵan jolaýshylar PTR-test anyqtamasyn kórsetýi qajet. Bul erejeler konsertterge, kınoteatrlarǵa jáne teatrlarǵa barý kezinde de qoldanylady.
Fransııa eńbek mınıstri Elızabet Born elde vaksına tólqujatyna qoıylatyn shekteýler jeńildeýi múmkin ekenin málimdedi. Ol úshin naýqastar sany azaıyp, vırýs aýyzdyqtalýy kerek.
«Densaýlyq jaǵdaıy jaqsaryp keledi. Eger bul rastalsa, biz erejelerdi jeńildete alamyz. Jaqyn kúnderi buǵan da jetýimiz múmkin», dedi Frans Inter radıosyna bergen suhbatynda E.Born.
Polsha AstvaZeneca vaksınasynyń 400,000 dozasyn Taıvanǵa beredi. Syrtqy ister mınıstrliginiń habarlaýynsha, bul qadam Taıvandaǵy vaksınasııa deńgeıin joǵarylatý maqsatynda jasalyp otyr.
Tokıoda tótenshe jaǵdaı rejimi qyrkúıektiń sońǵy aptasyna deıin uzartylady. Áıtse de, Japonııanyń qalǵan bóliginde karantındik sharalar jeńildetildi. О́tken aıda úkimet qabyldaǵan, Japonııa halqynyń shamamen 80 paıyzyna áser etken tótenshe sharalar 12 qyrkúıekte aıaqtalýy kerek edi. Biraq Tokıo men oǵan jaqyn mańdaǵy aımaqtarda naýqastardyń kóbeıýine baılanysty tótenshe jaǵdaı rejimin alyp tastaý keıinge shegerildi.
Slovakııada «Delta» shtammy tez taralyp keledi. Densaýlyq saqtaý mınıstrliginiń málimetine súıensek, elde anyqtalǵan ınfeksııalar arasynda onyń úlesi 99 paıyzdan asady. Sarapshylardyń aıtýynsha, Slovakııada COVID-19 epıdemııasynyń úshinshi tolqyny bastaldy.
Reseıde táýligine 19 myńǵa jýyq adam ınfeksııa juqtyrǵan. Jalpy, pandemııa bastalǵaly 6 933 954 turǵyn koronavırýs ınfeksııasyna ilikken. 186 407 adam qaıtys boldy.
Týrızm salasy ekinshi jyl qatarynan COVID-19 pandemııasynan zardap shegip otyr. Atalǵan sala 2020 jyly áýe qatynasy toqtatylǵan kezde aıtarlyqtaı shyǵynǵa ushyrady. Búkil álemde halyqaralyq týrıster sany 73 paıyzǵa azaıdy.
2020 jyly álemdik týrızm ındýstrııasyna ınvestısııalar jyldyq eseppen 29,3 paıyzǵa azaıǵan. Al týrızmge baılanysty qonaqúı men tamaqtaný oryndarynyń kirisi 2019 jylmen salystyrǵanda 46,3 paıyzǵa tómendegen.