Qoǵam damýynyń basty kórsetkishi – ekonomıkasymen qatar mádenıeti, ádebıeti men bilimi, ǵylymy. Prezıdent Q.Toqaevtyń bılyǵy Joldaýy elimizdiń damý keleshegin aıqyndaıtyn mańyzdy qujat retinde respýblıka jurtshylyǵymen qatar, óner adamdarynyń da kókeıine qalyń oı saldy.
Tarıhy ǵasyrlar qoınaýynda tereńdep jatqan halqymyz úshin kıeli de qasterli uǵym – táýelsizdik basty qundylyǵymyz, kók baıraǵymyzdaı jelbirete otyryp, maqtan tutar baılyǵymyz. Osy otyz jylda eńsesin tiktep, jeke-dara memleket retinde álem tanyǵan elge aınaldyq. Qoınaýy en baılyqqa toly ulanǵaıyr atamekenimizdiń asqaq ekenin sezingende júregimiz elegizıdi. Biraq ishki sezim men naqty is úılespese nátıjesi bolmasy anyq. Osy oraıda Prezıdent Joldaýy barlyq salanyń bilikti mamandaryna asqan jaýapkershilik júkteı otyryp, aldaǵy ýaqytta júzege asatyn árbir isti elimizdiń keleshegimen baılanystyryp otyr.
Prezıdent pandemııadan keıingi kezeńde ekonomıkamyzdy, densaýlyq, bilim salasy, óńirlik saıasatty damytý máselelerin qamtı otyryp, adam quqyǵyn qorǵaý, ulttyń uıysýyn jańa dáýirdegi jarqyn ómirimizben baılanystyrady. Kez kelgen memlekettiń basty baılyǵy – adam kapıtaly. Al adam kapıtalynyń qaınar kózi áleýmettik áleýetimizdiń joǵarylyǵy, sapaly bilim men densaýlyqta jatyr. Deni saý, oıy ozyq ult qana zamanaýı qoǵammen básekege túse alady. Tamyryn tanyp, ulttyń ýyzyna qanyp ósken urpaq, shekara asyp jaıyn kúıttep ketpeı, eline qyzmet etedi. Rýhy bıik ult qana álemmen terezesin teń ustaı alady. Bilimi sapaly, eńbeginiń óteýi baǵalanyp tursa, kánekı. Pandemııa kezinde medısına, ǵylym salasyn damytýdyń mańyzdylyǵyna kózimiz jetti. Osy oraıda dáriger men muǵalimniń mereıin ústem etip, eńbegin baǵalaý qajettiligi týyndady. Sol sııaqty aldaǵy ýaqytta elimizdiń damýyna barynsha úles qosatyn qaı salada bolsyn kásibı mamandardyń sanyn arttyrý, olardyń eńbegin baǵalaý, biliktiligine kóńil bólý, bilimin damytýǵa, turmys jaǵdaıyn jaqsartýǵa qoldaý jasaý sııaqty mańyzdy máseleler boı kórsetedi.
Basty ulttyq qundylyǵymyz – ana tilimizdiń mereıin ústem etýde, tarıhymyzdy dáripteýde osy týǵan jerdiń bir ýys topyraǵynan nár alǵan árbir jannyń el aldyndaǵy boryshy men paryzy ústem. Búginde birlikti, tatýlyqty baǵdar etken Qazaqstandaı el úshin bir shańyraq astynda turyp jatqan etnos ókilderiniń «bir jaǵadan bas, bir jeńnen qol shyǵaryp» eńbek etpegi kerek. Sonda ǵana tirligi men birligi myǵym eldiń bolashaǵy berekemen ǵana óriletin bolady.
Asanáli ÁShIMOV,
Qazaqstannyń Eńbek Eri