AQSh-ta «Ida» daýyly Lýızıana men Mıssısıpı shtattaryn shyǵynǵa ushyratty. Sondaı-aq tropıkalyq daýyl saldarynan Nıý-Iork pen Nıý-Djersı shtattary da qatty zardap shekken. Qaza tapqandar sany 60-qa jetti.
Turǵyndar qazirgi tańda qoqystardy tazartýǵa kiristi. Ázirge eldiń soltústik-shyǵysyndaǵy shtattarda 50-den astam adam qaıtys bolǵan. Basqa shtattarda da birneshe adam baqıǵa attanǵan.
Daýyl saldarynan qoǵamdyq kólikter toqtap qaldy. Qazir AQSh-ta «Eńbek demalysyn» atap ótip jatyr. Nıý-Iork qalasynyń operatorlary jumys kúni bastalǵanǵa deıin keıbir qalaaralyq jelilerdi qalpyna keltirýge ýáde berdi.
Lýızıana shtatynda elektr jaryǵy bolmaǵandyqtan, kóp adam janarmaı quıý beketterinde uzaq kezekke turyp, generatorlarǵa janarmaı izdeýge májbúr. Jaryq kelesi aptaǵa deıin janbaıdy. Aq úı aldaǵy ýaqytta daýyldan kelgen zardaptyń kólemin esepteýge kirisetinin habarlady.
Prezıdent Djo Baıden daýyldan keıin halyqqa Joldaý arnap, onda birqatar máselege toqtaldy.
«Ida» daýyly, eldiń batysyndaǵy orman órtteri men Nıý-Iork pen Nıý-Djersıdegi buryn-sońdy bolmaǵan sý tasqyny – klımat daǵdarysy kelip jetkenin kórsetedi. Mundaıǵa daıyn bolýymyz kerek. Sondyqtan áreket etetin kez keldi», dedi Aq úı basshysy.