Aýǵanstannan jetken málimetke qaraǵanda, «Talıban» men qarsylyq kúshteri Pandjsher ańǵarynyń mańynda shaıqasyp jatyr. Eki tarap ta oqıǵa týraly qarama-qaıshy aqparat taratyp otyr.
«Talıban» (Qazaqstanda tyıym salynǵan terrorıstik uıym) da, onyń qarsylastary da basymdyqqa ıe ekenin aıtady. Uıym basshylary ańǵardy ıelikke alǵanyn málimdegen. Sóıtip Kabýlda «Talıban» ókilderi aspanǵa oq atyp, toılaǵan edi. Jergilikti buqaralyq aqparat quraldarynyń habarlaýynsha, aspanǵa oq atý saldarynan 17 adam qaza taýyp, 41-i jaralanǵan.
Alaıda shyn máninde «Talıban» jeńdi degen habardy rastaý múmkin bolmaı tur. О́ıtkeni memleket basshysy Ashraf Ǵanı elden qashyp ketken soń, kúresti toqtatpaıtynyn aıtqan vıse-prezıdent Amrýlla Saleh áleýmettik jeli arqyly elden qashyp ketkeni týraly qaýesetti joqqa shyǵardy.
A.Saleh dálel retinde VVS-ge vıdeo habarlama jibergen. Onda burynǵy vıse-prezıdent qashyp ketti degen aqparattyń negizsiz ekenin aıtty.
«Qıyn jaǵdaıda qalǵanymyzǵa kúmán joq. «Talıban» tarapynan qysym kórsetilip otyr. Biraq biz berilmeımiz», dedi ol.