Prezıdent teleradıokesheni «Abaıdyń qara sózderi» kórkem kınojobasyn túsirýge kiristi, dep habarlaıdy Egemen.kz.
Bul týraly Prezıdent teleradıokesheniniń baspasóz qyzmeti habarlady. 15 bólimnen turatyn joba «Ulttyq kınony qoldaý memlekettik ortalyǵynyń» qoldaýymen júzege asady. Túsirilim jumystary Almaty qalasy men Almaty oblysynyń aýmaǵynda 25 qazanǵa deıin júredi.
«Televızııa jobasynyń ár serııasy tolyqqandy sıýjetke qurylady. Sıýjetterde bas keıipkerdiń rólin Nurlan Álimjanov, Jan Baıjanbaev, Erik Joljaqsynov, Tuńǵyshbaı Jamanqulov, Arýjan Jazylbekova, Berik Aıtjanov, Aıan О́tepbergen sııaqty tanymal qazaqstandyq akterler somdaıdy. Joba avtorlary kúrdeli rejısserlik sheshimder arqyly uly oıshyldyń ańyzǵa aınalǵan «qara sózderin» jańa qyrynan ashýǵa tyrysady», dep jazylǵan resmı málimette.
«Teleradıokeshenniń bas dırektory Raýshan Qajybaevanyń aıtýyna qaraǵanda, tereradıokeshen ujymy bul jobaǵa úlken jaýapkershilikpen kirisip otyr. «Onyń fılosofııa paıymdary men danalyǵy ýaqyt ótken saıyn ózekti bola túsken. Oıshyldyń «Qara sózderi» qoǵamnyń rýhanı-mádenı ómirine baǵdar berip tur», deıdi Raýshan Qajybaeva.
«Aqyry oıladym: oıyma kelgen nárselerdi qaǵazǵa jaza bereıin, aq qaǵaz ben qara sııany ermek qylaıyn, kimde-kim ishinen kerekti sóz tapsa, jazyp alsyn, ıa oqysyn, keregi joq dese, óz sózim ózimdiki dedim de, aqyry osyǵan baıladym, endi munan basqa eshbir jumysym joq». Uly aqynnyń sol aıtqany aınymaı kelip, búgin jurt «qara sózben» jazylǵan rýhanı murany áli azyq qylyp keledi», dep jazady keshenniń baspasóz qyzmeti.