Ishki ister organdary qyzmetkerleriniń arasynda bıyl 11 jyl qatarynan uıymdastyrylǵan «Parasatty polıseı» respýblıkalyq baıqaýy máresine jetti. Baıqaýda Nur-Sultan, Almaty, Shymkent qalalary, oblystar jáne Kóliktegi polısııa departamentteri qyzmetkerlerinen, onyń ishinde ózge etnos ókilderi bar 17 komanda baq synasty.
El Táýelsizdiginiń 30 jyldyǵy men Qazaqstan halqy tilderi kúnin merekeleý aıasynda ótken bıylǵy baıqaýdyń bas júldesin Nur-Sultan qalasynyń polısııa departamenti jeńip alsa, birinshi orynǵa Batys Qazaqstan óńiriniń namysyn qoldan bermegen polıseıler komandasy taban tiredi. Al júldeli ekinshi oryndy Almaty men Qostanaı oblystarynyń komandalary ózara bólisip, 3-oryn Aqmola men Túrkistan oblystarynyń PD jáne Kóliktegi PD-niń enshisine tıdi. Dástúrli saıysqa qazylyq jasaǵan alqa múshesiniń biri ishki ister organdary jáne Ulttyq ulan qazaqstandyq ardagerler uıymynyń ardageri Slanqoja Qaraqystyq ishki ister organdary qyzmetkerleri arasynda memlekettik tildi keńinen nasıhattaýda «Parasatty polıseı» saıysynyń alar orny erekshe ekenin atap ótti.
Pandemııaǵa baılanysty bıyl baıqaý onlaın formatta ótkizilgen. Al ishki ister organdary arasynda keńinen tanymal saıystyń basty kózdegeni – tártip saqshylary arasynda memlekettik tildiń mártebesi men mańyzyn arttyrý, qoldanysyn keńeıtý bolyp sanalady. «Polısııa qyzmetkerleriniń memlekettik tilge, eline, Otanyna degen qurmetin arttyrý, tildik ortany qalyptastyrý, sondaı-aq, til mádenıetine tárbıeleýde de baıqaýdyń alar orny erekshe. Sol sebepti de bolar «Parasatty polıseıge» qatysý – ár qyzmetker úshin mártebe», deıdi is-sharaǵa muryndyq bolyp júrgen IIM Ideologııalyq jáne ımıdjdik jumys departamentiniń basshysy Albına Mahambetova.