Memleket basshysy Qasym-Jomart Toqaev Qazaqstan halqyna Joldaýynda memlekettiń qorǵanys-ónerkásip kesheni men Áskerı doktrınasyn qaıta qaraýdy tapsyrdy. Qarýly Kúshter syrttan tónetin qaýip-qaterlerge árqashan ázir bolýy kerek. Sonymen qatar memlekettik apparatta osyǵan qatysty is-qımyldyń pysyqtalǵan jospary bolýy shart.
Bundaı jaǵdaıda Qarýly Kúshter árdaıym sońǵy qoldaný quraly bolyp tabylady. Sondyqtan syrttan tónetin qaýipti modeldeý kezinde biz oqıǵalardy damytýdyń barynsha jaǵymsyz nusqalarynyń ssenarıılerin pysyqtaımyz.
Áskerı qaýipsizdikti qamtamasyz etý máselelerinde jańa óńirlik jáne jahandyq syn-tegeýrinder men qaýip-qaterlerdiń oryn alýyn eskerip, vedomstvoaralyq tásildi qoldaný ózekti bolyp otyr.
Qorǵanys mınıstrligi barlyq memlekettik organdarmen ózara is-áreket jasaý arqyly, áskerı qaterlerdiń órshýi jáne soǵys jaǵdaıy engizilgen kezde, memleket qyzmetin josparlaýdy júzege asyrady.
Qazirgi ýaqytta birlesken áskerı oqý-jattyǵýlardy ótkizý josparlanyp otyr. Jaǵdaıdyń kenetten ózgerýine qatysty máseleler de pysyqtalady. Bul rette Aýǵanstandaǵy jaǵdaıdyń shıelenisýine baılanysty qaýip-qaterler de negizge alynady.
Jańa Áskerı doktrınada bıýdjettiń múmkindikteri men otandyq ekonomıkanyń áleýetine tónýi múmkin qaterler eskeriledi. Osylarǵa súıenip, jalpy memlekettik qorǵanys saıasatynyń naqty saıası baǵdarlary qalyptasady.
Serik BORAMBAEV,
Qazaqstan Qarýly Kúshteri Bas shtab bastyǵynyń orynbasary, general-maıor