Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Shveısarııa Konfederasııasyna resmı saparmen bardy, dep habarlaıdy Egemen.kz QR Syrtqy ister mınıstrliginiń resmı saıtyna silteme jasap.
Qazaqstan men Shveısarııa ekijaqty qarym-qatynastardyń barlyq spektri boıynsha ózara tıimdi, kópjosparly yntymaqtastyqty damytýǵa nıetti. Qazaqstan SIM basshysy M.Tileýberdi Shveısarııa Vıse-prezıdenti, Federaldyq keńesshisi (mınıstri) Ignasıo Kassıspen kelissózderiniń negizgi leıtmotıvy osyndaı.
«Shveısarııa Qazaqstannyń Eýropadaǵy mańyzdy saıası jáne ekonomıkalyq áriptesteriniń biri. Biz senimge, ózara qurmetke jáne ortaq basymdyqtarǵa negizdelgen berik qatynastar ornattyq. Bul qatynastar jahandyq jáne óńirlik qaýipsizdikti qamtamasyz etýdegi senimdi seriktestikpen, serpindi saýda yntymaqtastyqpen, sondaı-aq saıası jáne tulǵaaralyq qatynastarmen nyǵaıtylýda», dedi M.Tileýberdi.
Qazaqstan men Shveısarııanyń joǵary basshylyǵy arasyndaǵy baılanystardyń qarqyndy damýyn jáne ekijaqty ózara is-qımyldy nyǵaıtýǵa ózara múddeliliktiń artyp kele jatqanyn atap ótip, taraptar úkimetaralyq, parlamentaralyq jáne iskerlik baılanystardy damytýǵa odan ári járdemdesýge kelisti.
Halyqaralyq máseleler boıynsha pikir almasý barysynda taraptar BUU, EQYU jáne basqa da kópjaqty qurylymdar aıasyndaǵy ózara is-qımyldy talqylady. Kelissózderdiń kún tártibine óńirlik máseleler, sonyń ishinde Aýǵanstandaǵy jaǵdaı, Ortalyq Azııa elderimen yntymaqtastyq jáne sý resýrstaryn basqarý kirdi. Damýǵa resmı kómek jelisi boıynsha, atap aıtqanda qazaqstandyq KazAID Halyqaralyq damý agenttigi jáne Shveısarııanyń SDC Damý jáne yntymaqtastyq agenttigi arasyndaǵy birlesken jumys aspektileri qozǵaldy.
Kelissózder qorytyndysy boıynsha delegasııa basshylary dıplomatııalyq nemese qyzmettik pasporttardyń ıelerin vızalyq talaptardan ózara bosatý týraly, sondaı-aq dıplomatııalyq ókildikter, halyqaralyq uıymdar janyndaǵy turaqty ókildikter men konsýldyq mekemeler qyzmetkerleriniń otbasy músheleriniń aqyly eńbek qyzmeti týraly eki úkimetaralyq kelisimge qol qoıdy.
Syrtqy saıası kún tártibindegi ekonomıkalyq dıplomatııanyń basymdyǵyn eskere otyryp, Mınıstr M.Tileýberdi sol kúni Shveısarııanyń «Stadler Rail», «Ammann Group», «Sandoz», «KS Genetics», «Inoks Capital» jáne «Philip Morris International» iri kompanııalarynyń basshylarymen kezdesýler ótkizdi.
Saýda-ekonomıkalyq yntymaqtastyqty damytýdyń úlken áleýeti Shveısarııa bıznesiniń hımııa-farmasevtıka jáne mashına jasaý, jańa tehnologııalar men energetıka salasynda, agroónerkásip kesheni (AО́K) men qarjy sektorynda ózara tıimdi jobalardy iske asyrýǵa múddeliligimen rastalady. Shveısarııanyń Qazaqstannyń iri syrtqy ekonomıkalyq seriktesteriniń biri retindegi róli men mańyzy atap ótildi. 2020 jyly Shveısarııa Qazaqstanǵa tartylǵan tikeleı sheteldik ınvestısııalar kólemi boıynsha 3-shi oryndy, al bizdiń elmen ekijaqty saýda kólemi boıynsha 10-shy oryndy ıelendi.
Sapar aıasynda «Kazakh Invest» UK» AQ men shveısarııalyq kompanııalar arasynda Qazaqstannyń AО́K jáne mashına jasaý salasyndaǵy ınvestısııalyq jobalardy iske asyrý boıynsha yntymaqtastyq týraly memorandýmdarǵa qol qoıyldy. Syrtqy ister mınıstri bastaǵan qazaqstandyq delegasııa Bern tarıhı murajaıynda Qazaq memlekettiliginiń tarıhynan biregeı muraǵattyq materıaldarǵa arnalǵan arnaıy kórmeni aralady. Mýzeıde sondaı-aq R.B.Súleımenov atyndaǵy Shyǵystaný ınstıtýty, Bern tarıhı mýzeıinde jáne Bern ýnıversıteti arasynda «Ortalyq Azııa men Shveısarııanyń túrki halyqtarynyń murasy» atty kelisimge qol qoıý rásimi ótti.