Nur-Sultan qalasynyń ákimi Altaı Kólginov Instagram paraqshasynda eki jyl ishinde ınvestısııa tartý jónindegi keńesterdiń nátıjesinde 18 myńnan astam jumys orny qurylǵanyn, 150-den astam jobaǵa qoldaý kórsetilgenin málim etti, dep habarlaıdy Egemen.kz.
«Investorlar úshin elordamyzdyń tartymdylyǵy jyl saıyn artyp keledi. Byltyr pandemııaǵa qaramastan ınvestısııa kólemin arttyra aldyq. Jeke ınvestısııalardy qala men turǵyndarǵa qajet jobalardyń qurylysyna jumsaımyz. Máselen, ótken jyly qalaǵa rekordtyq – 1 trıllıon teńgeden astam ınvestısııa tarttyq. Al bıyl 7 aıdaǵy ınvestısııa kólemi – 504 mlrd teńgeden asady, byltyrǵy kezeńmen salystyrǵanda ósim 9%-dy quraıdy», dedi Altaı Kólginov
Nur-Sultanda ınvestısııa tartý boıynsha ınvestısııalyq keńester ótkizý júıelik negizge aýysqan. Sonymen qatar, Astana Invest ınvestısııa tartý boıynsha óńirlik front-ofıs jumys isteıdi, onda ınvestorlardy «bir tereze» qaǵıdaty boıynsha, onyń ishinde memlekettik qyzmet kórsetý rásimderinen ótý kezinde tolyq súıemeldeý júzege asyrylady. Osy ýaqyt ishinde 18 myńnan astam jumys ornyn quraǵan 150-den astam joba qoldaý tapty. Bul – medısına, bilim berý, logıstıka, saýda, ónerkásip, sport, elektr energııasy jáne t.b. salalardaǵy jobalar.
Sondaı-aq, tartylǵan ınvestısııalar esebinen jylyna jalpy qýaty 10 myń tonna bolatyn 3 kóterme-taratý ortalyǵy men eki jylyjaı kesheniniń qurylysyn júrgizip jatyrmyz. Qurylysty aıaqtaý 2022-2023 jyldarǵa josparlanǵan. Sonymen qatar, jylyna 5 myń tonna nan-toqash shyǵaratyn kombınat salý boıynsha ınvestısııalyq joba iske asyrylýda. Paıdalanýǵa berý merzimi osy jyldyń sońyna josparlanǵan.
«6 myń tonnaǵa deıin kókónis saqtaıtyn qoıma salý úshin ınvestorlar tartyldy. Kelesi jyly paıdalanýǵa berýdi josparlap otyrmyz. О́ńirlik ınvestısııalyq keńes aıasynda jalpy quny 2,6 mlrd teńge bolatyn óndiristik-tamaq kesheniniń qurylysyn da qoldadyq. Jobanyń qýattylyǵy: sút óńdeý zaýyty – táýligine 100 000 tonna; nan-toqash kombınaty – táýligine 25 tonna, kókónis qoımasy – 6000 tonna», dep jazdy Altaı Kólginov.