Shymkent qalasynyń densaýlyq saqtaý basqarmasynyń basshysy B.Pozılov pen bilim basqarmasynyń basshysy J.Tájıevanyń qatysýymen aqparattyq-kommýnısııalyq ortalyqta balalarǵa salynatyn vaksınasııa týraly brıfıng ótti, dep jazady Egemen.kz.
Densaýlyq saqtaý basqarmasy basshysynyń aıtýynsha, elimizde koronavırýsqa qarsy salynyp jatqan vaksınanyń barlyǵy 18 jastan asqandarǵa arnalǵan.
«Balalarǵa vaksına salynady eken degen qaýeset halyqty úreılendirip jatyr. Vaksınanyń balalarǵa salynatynyn rastaıtyn eshqandaı resmı qujat joq. Sondyqtan mundaı ańyz aqparatty taratýdy doǵarý kerek. Onyń barlyǵy halyqty alańdatý maqsatynda jasalyp jatyr dep oılaımyn. Al aǵymdaǵy jyldyń 15 qyrkúıeginen bastap elimizde tumaýǵa qarsy ekpe saldyrý jumystary bastalady. Bul vaksına turǵylyqty mekenjaıy boıynsha kelisim bergen jaǵdaıda qaýip-qater tobyndaǵy azamattarǵa tegin salynady. Barlyq qala turǵyndaryn «oqýshylarǵa kovıdke qarsy vaksına salynady» degen qańqý sózderge senbeýge shaqyramyn», dedi B.Pozılov.
Qalanyń bas dárigeri Shymkentte epıdemııalogııalyq jaǵdaıdyń turaqtalǵandyǵyn atap ótti. Búginde 1134 azamat stasıonarda em qabyldap jatyr. Tósek-oryn tolymdylyǵy 45% quraıdy, 1366 tósek orny bos.
Al qala boıynsha búginde vaksınanyń I komponenti 443 287 adamǵa, II komponenti 375 000 adamǵa salyndy.
О́z kezinde bilim basqarmasynyń basshysy J.Tajıeva kez kelgen vaksına ata-ananyń ruqsatynsyz salynbaıtynyn jáne taralyp jatqan aqparattardyń jalǵan ekenin aıtty.
«Búgingi tańda qaladaǵy 203 mektepte 233 myńnan asa oqýshy oqıdy. Barlyq bilim berý mekemelerinde sanıtarlyq talap qatań saqtalǵan», dep jazady Shymkent qalasy ákimdiginiń baspasóz qyzmeti.