Búgin isker, óz jumysynyń has sheberi, Atyraý munaı óńdeý zaýytynyń qyzmetkeri Zeıin Sabıtuly Shamarov týraly áńgime órbitpekpiz.
Zeıin Shamarov 1969 jyly Gýrev qalasynda muǵalim men balyq kombınatynda eńbek etken jumysshy otbasynda dúnıege kelgen. Bala kezinen sabaqqa alǵyr, zerek bolǵan ol óziniń atyna zaty saı atanyp eńbekke qushtar bolyp ósedi. Er jetip, aýyl sharýashylyq tehnıkýmynyń mehanık mamandyǵyn támamdap, áskerı boryshyn ótep keledi. 1990 jyldary eńbekke belsene aralasady. Alǵashqy eńbek jolyn «Soltústik Embi munaı barlaý ekspedısııasynda» motorıst bolyp qyzmet ete otyryp, Atyraý munaı-gaz ınstıtýtynyń ınjener-tehnolog mamandyǵyn támamdaıdy. 1995 jyldyń 25 qańtarynda Atyraý munaı óńdeý zaýytynyń 4-shi sehyna estakada operatory bolyp ornalasady. Bir orynda tapjylmaı 13 jyl eńbek etip, jumystyń ashysy men tushysyna tótep berip eńbekqorlyqtyń nátıjesinde operator, aǵa operator, estakada mehanıgi, estakada basshysy laýazymdarynda eńbek etedi. Qazirgi tańda munaı ónimderin óndirý jáne tasymaldaý óndirisiniń rezervýarlyq parkiniń basshysy mindetin atqarýda.
Ol ujymda jumys barysyn aldyńǵy orynǵa qoıyp, jumysshylardan jumysqa degen jaýapkershilikti, uqyptylyqty, tártipti talap etedi. Sebebi rezervýar parki tikeleı zaýyttyń tehnologııalyq qondyrǵylaryn munaımen qamtamasyz etý jumystaryn atqarady.
– Negizinde men syzýdy óte jaqsy kóremin. Buryndary osy syzýǵa qatysty qyzmet atqaramyn dep oılaıtynmyn. Oqýdy aıaqtar aldyndaǵy dıplom qorǵaý kezinde qazaq tilinde «beske» tapsyrǵan stýdenttiń biri boldym. Táýelsizdik alǵan jyldary barlyǵy orys tilinde bolǵandyqtan, qazaq tilinde tapsyryp, barlyǵyn tańǵaldyrǵan edim. Sonyń arqasynda zaýytqa qyzmetke turyp, búgingideı dárejege jetip otyrmyn. Zaýyt meniń ekinshi úıime aınaldy. Meniń osy zaýytta belgili maman bolyp qalyptasýyma kúsh salyp, kóp kómegin tıgizgen jandar bar. Olar – Oraq Orazmuhambetov, Fatıma Kenjeǵalıeva, Nurbek Qonysov, Valerıı Tarabrın, Marat Karımov, Qosyman Karımov syndy óz isiniń mamandary. Sol sııaqty men de keıingi jastarǵa úlgi bolýǵa tyrysyp, bilgenimdi úıretýdemin, deıdi Zeıin Sabıtuly.
Osy 26 jyl eńbek jolynda Zeıin Shamarov «Kásibı qyzmette jetken joǵary nátıjeleri men munaı-gaz salasyn damytýǵa qosqan úlesi úshin Energetıka mınıstrliginiń Qurmet gramotasymen, «Atyraý munaı óńdeý zaýytyna – 70 jyl», «Atyraý munaı óńdeý zaýytyna – 75 jyl», «Qazaqstan munaıyna – 120 jyl» merekelik medaldarymen marapattaldy. Atyraý munaı óńdeý zaýytyndaǵy uzaq jylǵy minsiz eńbegi úshin «Baıyrǵy qyzmetker» ataǵyna ıe boldy.
Zeıin Shamarov – otbasynda bir ul, eki qyz tárbıelep otyrǵan úlgili otaǵasy.