Meksıkanyń Idalgo shtatynda qatty nóser jańbyrdyń saldarynan sý tasqyny bolyp, elektr jaryǵy óship qalǵandyqtan jergilikti aýrýhanada jatqan 17 adamǵa ottegi berilmeı, kóz jumdy. Bul týraly 8 qyrkúıek kúni Meksıka Prezıdenti Andres Manýel Lopes Obrador málim etti, dep habarlaıdy Egemen.kz.
Dúısenbi keshke bastalǵan nóserdiń saldarynan ózender tasyp, Týla qalasyndaǵy aýrýhananyń birinshi qabatyn sý basqan. Transformator isten shyǵyp, mekeme elektrsiz qaldy. Koronavırýs juqtyrǵan keıbir aýyr jaǵdaıdaǵy naýqastarǵa osy kezde ottegimen tynys berilip turǵan. Qutqarýshylar aýrýhanadan 40 adamdy alyp shyqqan.
Meksıka bıligi tabıǵı apattyń saldaryn joıýǵa áskerin jumyldyrdy. Sý tasqynynan 30 myńnan asa adam zardap shekti. Seısenbi kúni Meksıkanyń Gerrero shtatynda, Mehıkodan 300 shaqyrym jerde ornalasqan Akapýlko kýrortyna jaqyn jerde 7,1 baldyq jer silkinisi boldy.
Ulttyq seısmologııalyq qyzmettiń habarlaýynsha, odan keıin taǵy 70 jer dúmpýi qaıtalanǵan. Meksıka Prezıdenti óziniń qysqa beınehabarlamasynda jer silkinisinen ǵımarattar asa qatty qıramaǵanyn, alaıda bir adamnyń qaza tapqanyn málimdedi. Elektr berý jónindegi federaldy komıssııanyń derekterine saı, jer silkinisi saldarynan Meksıkada 730 myńnan asa adam elektr jaryǵynsyz qalǵan, bul barlyq tutynýshynyń 22%-y.