Nur-Sultan qalasynyń Investısııalar jáne kásipkerlikti damytý basqarmasy Áleýmettik mańyzy bar azyq-túlik, onyń ishinde kókónis baǵasynyń jaǵdaıy týraly aıtty, dep habarlaıdy Egemen.kz.
«Áleýmettik mańyzy bar azyq-túlik taýarlarynyń baǵasyna keletin bolsaq, basqarma, sondaı-aq baǵany turaqtandyrýmen aınalysatyn mamandandyrylǵan uıym (ÁKK) apta saıyn baǵa monıtorıngin júrgizedi. Bıyl Qazaqstan boıynsha ınflıasııa ósimi shamamen 10%-dy qurady. Azyq-túlik taýarlaryna keletin bolsaq, bul 10,7%. Bul kórsetkish boıynsha Nur-Sultan qalasy altynshy nemese jetinshi orynda», dedi qalalyq máslıhattaǵy turaqty komıssııalardyń otyrysynda Nur-Sultan qalasynyń Investısııalar jáne kásipkerlikti damytý basqarmasy basshysynyń mindetin atqarýshy Erjan Baltaev.
Ol halyqtyń eń kóp tutyný kólemi birinshi qajettiliktegi ónimge tıesili ekenin aıtyp, elordada qandaı kókónisterge baǵanyń óskenin atap ótti.
«Sońǵy aptada áleýmettik mańyzy bar ónimderge baǵa ındeksi shamamen 99%-dy quraıdy. Biz qazir áleýmettik mańyzy bar ónimderge, ásirese kókónis toptaryna baǵa tómendegen kezeńnen ótip jatyrmyz. Jyl basynan beri baǵanyń ósýi 10,7%-dy qurady. Kókónis tobynda baǵanyń eń joǵary ósýi baıqalady. Pııaz baǵasynyń ósýi shamamen 65%-dy, sábiz - 65%-dy, qyryqqabat - 42%-dy, kartop-30%-dy qurady», dedi E.Baltaev.
Al baǵanyń tómendeýi kúrishke - 9%, jumyrtqaǵa - 4,6%, qaraqumyqqa - 3,5% baıqalady.
«Negizinen baǵanyń ósýi maýsymdyqpen baılanysty. Nur-Sultan qalasy Aýyl sharýashylyǵy óńiri emes ekenin eskere otyryp, bizde óz ónimderimizdi kókónis ónimderi boıynsha ósirýge múmkindik joq. Baǵanyń ósýi maýsym-shildege deıin jalǵasady. Maýsym aıynan bastap jańa eginniń kelýimen baǵalar birtindep tómendeıdi. Eń joǵary tómendeý tamyz aıynan bastap baıqalady», dep túsindirdi spıker.
Sonymen qatar baǵanyń qymbattaýyna kommýnaldyq qyzmetter men kólik shyǵyndary da barynsha áser etetinin aıtty.