Biz, Abaı mýzeıiniń qyzmetkerleri májilis zalyna jınalyp, Joldaýdy tyńdap, óz oıymyzdy ortaǵa saldyq. Jeti baǵyt boıynsha josparlanǵan isterdi tyńdap, eńsemiz kóterilip, marqaıyp qaldyq.
Memleket basshysy osy Joldaýyn Táýelsizdiktiń bárinen qymbat ekeninen bastady: «Bıyl egemen el bolǵanymyzǵa 30 jyl tolyp otyr. Táýelsizdik – bizdiń eń qasterli qundylyǵymyz. Qazaqstan Tuńǵysh Prezıdentimiz – Elbasynyń dara saıasatynyń arqasynda tabysty el retinde búkil álemge tanymal boldy. Eń basty jetistigimiz – birtutas el bolyp, jańa memleket qurdyq. Irgemizdi bekitip, eńsemizdi tiktedik. Halyqaralyq qaýymdastyqtyń beldi múshesine aınaldyq. Turaqty qoǵam qalyptastyryp, ornyqty damý jolyna tústik. Memlekettiligimizdi nyǵaıtý úshin bir el bolyp eńbek etip jatyrmyz. Egemendik degenimiz – jalań uran men jalyndy sóz emes. Biz úshin eń mańyzdysy – ár azamattyń Táýelsizdik ıgiligin sezine alýy». Táýelsizdiktiń ıgiligi – bul asa qudiretti sóz.
Jasyratyny joq, byltyr ǵana, Prezıdentimizdiń tikeleı qoldaýymen bizdiń mýzeı «qaıta túlep ushqan qyrandaı» boldy.
Hakim Abaıdyń 175 jyldyq mereıtoıyna Qasym-Jomart Kemeluly ózi kelip, jańarǵan mýzeıdi ashyp berdi. Halyq arasynda búginde Abaı mýzeıi týraly «Danalyq pen jańalyqtyń úndesken mýzeıi» degen tirkes te qalyptasty. Pandemııanyń asqynyp turǵan kezinde, Abaı mýzeıinde qurylys, qaıta jańǵyrtý, mýzeılendirý jáne ǵylymı-tanymdyq jumystary óte qarqyndy júrdi. Biz birliktiń arqasynda, talapqa saı tártiptiń arqasynda bárin abyroımen atqaryp shyqtyq.
«Halyq birligi jáne júıeli reformalar – el órkendeýiniń berik negizi» atty Memleket basshysynyń Qazaqstan Halqyna Joldaýyn tolyq qoldaımyz. Basty kúsh – birlikte.
Turdyqul Shańbaı,
Abaıdyń «Jıdebaı-Bórili» memlekettik qoryq-mýzeıiniń dırektory