Atyraýda tólem júıesinen 11 mln teńge jymqyrǵan qylmystyq top ustaldy, dep habarlaıdy Egemen.kz.
Atyraý oblysy Polısııa departamenti Krımınaldy polısııa basqarmasynyń qyzmetkerleri óńirde iri kólemde qarajat jymqyrǵan uıymdasqan qylmystyq topty ustady.
Polısııa qyzmetkerlerine JShS-niń qaýipsizdik qyzmetkeri habarlama bergen. Tártip saqshylary dereý jedel is-shara uıymdastyryp, nátıjesinde atalǵan JShS-te buryn qyzmet atqarǵan qyzmetkerler ekenindigin anyqtady. Olardyń biri qazirgi kúnge deıin sol jerde jumys jasap, málimettermen bólisip otyrǵan.
Tintý kezinde 31 jastaǵy er adamnyń úıinen alty dana tólem termınaldary, kompıýterlik komponentter jáne qosymsha perıferııalyq qurylǵylar tabylyp, tárkilendi. Top músheleriniń biri tólem júıesine kirý parolderimen qamtamasyz etse, endi biri urlanǵan aqshalardy ózara bólip otyrǵan.
«2021 jyldyń 21 naýryzynan bastap shildeniń 4-ne deıingi ýaqyt kezeńinde belgisiz tulǵalar tólem júıesine zańsyz qol jetkizý jolymen jalpy somasy 11 170 000 teńge aqsha qarajatyn urlady», deıdi Atyraý oblysy Polısııa departamentiniń bastyǵy Qamza Úmbetqalıev.
Derekterge súıensek, alty adamnan turatyn qylmystyq top úsh aı boıy aılasyn iske asyryp kelgen.
Qazirgi ýaqytta 26-31 jas aralyǵyndaǵy alty kúdiktige qatysty QR QK-niń 188-baby 4-bóligi 3-tarmaǵymen sotqa deıingi tergeý amaldary júrgizilýde. Kúdiktiler kinásin tolyqtaı moıyndap, ýaqytsha ustaý ızolıatoryna qamaýǵa alyndy.